Pogba mættur til æfinga en Raiola vill koma honum til Barcelona

Paul Pogba er mættur aftur til æfinga hjá Manchester United eftir að hafa fengið gott frí eftir að orðið heimsmeistari með Frakklandi í sumar.

Pogba var þar af leiðandi ekki með United í Bandaríkjunum í æfingarferð en myndir voru birtar af Pogba á æfingarsvæði United í dag að grínast í liðsfélaga sínum Eric Bailly.

Mino Raiola, umboðsmaður Pogba, er þó á Englandi og er hann sagður vilja koma Pogba til Barcelona áður en félagsskiptaglugginn lokar á fimmtudagskvöldið því deildin sjálf hefst á föstudag.

Juventus er einnig sagt áhugasamt um að fá Pogba aftur til félagsins en Juventus seldi Pogba til United sumarið 2016 fyrir 93 milljónir punda.

Hann á þrjú ár eftir af samningi sínum við United en hann viðurkenndi í viðtali fyrir HM að hann og Jose Mourinho, stjóri United, hafi átt í smá vandræðum sín á milli á síðustu leiktíð.

Mourinho sagði þó á dögunum að hann hefði trú á Pogba og hvatti hann til þess að mæta til leiks og gefa allt sem hann á fyrir United á næstu leiktíð.