Höfundur Frystikistulagsins rólegur yfir gagnrýni

Þolendur heimilisofbeldis eru ekki sáttir við auglýsingu í nýjasta sölubæklingi Elko, en þar er dreginn fram sá eiginleiki frystikistu að hún sé ‚læst utanfrá‘. Baráttufólk gegn kynbundnu ofbeldi gagnrýnir auglýsinguna harðlega á lokuðum umræðuvef á Facebook og telja að um tilvísun í Frystikistulag Greifanna að ræða.

„Þetta lag kallar fram hjá mér alveg hryllilegar minningar. Ég var ný sloppin úr víti heimilisofbeldis þegar þetta lag kom út fyrir þrjátíu árum,“ segir Ingunn Vigdís Sigmarsdóttir, kennari og skáld.

„Þessu var hampað mikið á sínum tíma sem miklu stuðlagi og er enn í einhverri spilun þrátt fyrir að öllum ætti að vera ljóst hvað textinn er ógðeðfelldur, þarna er ekkert verið að tala undir rós heldur eru í textanum mjög beinskeittar lýsingar á hræðilegu ofbeldi manns í garð eiginkonu sinnar," segir Ingunn.

„Þessi setning er sett til aðgreiningar frá annarri frystikistu í bæklingnum sem er ekki með læsingu," segir Bragi Þór Antoníuson, markaðsstjóri Elko sem stórefast um að textinn eigi að vera tilvísun í Frystikistulagið.

„Þetta er náttúrulega bara ofboðslega óheppilega orðað því við viljum ekki með nokkrum hætti tengja okkur við kynbundið ofbeldi eða umræðu um ofbeldi gegn konum,“ segir Bragi.

„Ég var náttúrulega bara 18 eða 19 ára þegar ég samdi lagið og opinber umræða um heimilisofbeldi eða kynbundið ofbeldi var varla til staðar á þeim tíma,“ segir höfundur lags og texta, Sveinbjörn Grétarsson, eða Bjössi í Greifunum eins og hann er kallaður. Bjössi bendir hins vegar á að engin ástæða sé til að halda með gerandanum í textanum enda hafi hann hlotið makleg málagjöld í lok lagsins.

Aðspurður segist Bjössi ekki ætla að stíga fram til að biðjast afsökunar á laginu eða óska eftir að það verði tekið úr spilun.

 

„Þeir sem hafa orðið fyrir ofbeldi verða líka að reyna að horfa fram á veginn, því menn geta alltaf fundið eitthvað í umhverfinu til að ýfa minningarnar upp. Það breytist ekkert. Ég hef alveg orðið fyrir mínum tragedíum og veit það,“ segir Bjössi.

Úr texta Frystikistulagsins:

Hún öskraði og kom þar með upp um sig.

Augun voru stjörf af ótta,

hún bað mig að hætta, já, hún grátbað mig

og reyndi svo að leggja á flótta.

En ég var sneggri og greip í hennar hár

og í það fast ég rykkti.

Dró hana til mín lipur og frár

náði ég henni og kyrkti.

Já, það er gott að vera laus við þetta leiðinda skass.

Hvað á ég nú að gera við þetta hlass?

Þá dyrabjallan hringdi og mér dauðbrá.

Hvað átti ég nú að gera?

Ég strunsaði út að glugganum og þá ég sá

að þetta mundi lögreglan vera.

Ég ákvað í flýti að fela mig

og fór ofan í frystikistu.

Þarna mundi löggan aldrei finna mig,

allavega ekki í fyrstu.

Þá allt í einu mundi ég þar sem ég lá,

að fjandans frystikistan var læst utanfrá.