Flugstjóri farþegavélar dó áfengisdauða rétt fyrir brottför

Flugmaður í Kanada var handtekinn í þann mund sem hann ætlaði að fara að fljúga farþegaflugvél. Maðurinn var dauðadrukkinn og var mættur í flugstjórnarklefann þegar hann var handtekinn. BBC greinir frá.

Um er að ræða vél á vegum lággjaldaflugfélagsins Sunwing Arlines en hún var á leiðinni frá Calgary til Cancun í Mexíkó með yfir 100 farþega. Áhöfnin sem átti að fljúga með manninum tók eftir undarlegri hegðun hans en að lokum dó maðurinn áfengisdauða í flugstjórnarklefanum.

Þá kallaði áhöfnin til lögregluna sem mætti og handtók manninn. Flugmaðurinn var með yfir þrisvar sinnum leyfilegt magn áfengis í blóðinu. Að sögn lögreglyfirvalda hefði maðurinn getað orsakað stórslys hefði hann komist upp í loft óáreittur en ólíklegt er þó talið að hann hefði ráðið við að stjórna slíkri flugvél í því ástandi sem hann var í.

Maðurinn verður ákærður og fær ekki að fljúga í bráð.