Hugmyndir um gjaldtöku á stofnleiðum út úr borginni kynntar í vor

Samgönguráðherra segir skipulagsyfirvöld í Reykjavík koma í veg fyrir nauðsynlegar umbætur í samgöngumálum í borginni. Hann muni leggja fram niðurstöður varðandi mögulega gjaldtöku á helstu leiðum út úr borginni í vor.

Bryndís Haraldsóttir þingmaður Sjálfstæðisflokksins hóf sérstaka umræðu um samgöngur á höfuðborgarsvæðinu á Alþingi í dag. Hún sagði umferðatafir á svæðinu orðnar töluverðar enda hefði bílum fjölgað um tugi þúsjnda á stuttum tíma og ætti eftir að fjölga meira með fjölgun íbúa og ferðamanna.

Sveitarfélögin á höfuðborgarsvæðinu hafa þannig komið sér saman um að breyta þessum kúrs og leggja mikla áherslu á almenningssamgöngur og borgarlínuna. Þar ríkir mikil samstaða um að fara verði í það átak að leggja áherslu á breyttar ferðavenjur,“ segir Bryndís.

Borgarlínan muni kosta 40 til 100 milljarða og þrátt fyrir hana yrði líka að fara í dýrar vegaframkvæmdir á höfuðborgarsvæðinu og spurning hvort ríkið kæmi þar að með sveitarfélögunum.

Jón Gunnarsson samgönguráðherra sagði Alþingi sníða vegaframkvæmdum þröngan stakk en viljinn væri fyrir hendi hjá honum. Stofnbrautir í byggð væru á höndum vegagerðarinnar en skipulagið í höndum sveitarfélaga.

Umferð á höfuðborgarsvæðinu hefur aukist mikið á síðustu árum. Erfiðasti flöskuhálsinn í bílaumferð á höfuðborgarsvæðinu í dag eru gatnamót Reykjanesbrautar og Bústaðavegar. Í samgönguáætlun er reiknað með því að þar verði mislæg gatnamót en vandinn er sá að ekki hefur náðst samkomulag við skipulagsyfirvöld í Reykjavík um þetta,“ segir Jón.

Eitt af þeim verkefnum sem samgönguráðherra segir brýnt að ráðast í er að leggja mislæg gatnamót við gatnamót Miklubrautar og Kringlumýrarbrautar vegna mikillar slysahættu.

„Og það er slæmt að við skulum ekki ná samstöðu með borgaryfirvöldum um að fara í mikilvægar framkvæmdir á þessum hættulegustu gatnamótum landsins,“ segir samgönguráðherra.

Þá sé brýnt að breikka vegi í gegnum Hafnarfjörð, Mosfellsbæ og Kjalarnes, sem og breikkun Suðurlandsvegar út úr borginni og fleira ásamt lagningu Sundabrautar. Ráðherrann fagnaði einnig áætlunum um borgarlínu og sagði ríkið tilbúið að koma að henni. Þá væri starfshópur að skoða helstu stofnleiðir inn og út af höfuðborgarsvæðinu.

„Þar sem yrði um að ræða fullfrágang á þessum helstu leiðum sem myndi þá byggja á einhvers konar gjaldtöku. Þetta mál er í skoðun og við munum leggja niðurstöður þessarar vinnu fyrir þingið, þingnefndir og aðra á vordögum, segir Jón Gunnarsson.