Alltaf verið rosalega gaman í afmælinu

Gunnar Már Hauksson, fyrrverandi útibússtjóri í Búnaðarbankanum og skrifstofustjóri Landakotsspítala, varð áttræður í vikunni. Í tilefni af því blés hann til tveggja daga afmælisgleði.

Það er ekkert grín fyrir Gunnar að koma afkomendum sínum á sama stað, en þeir eru búsettir víðsvegar á jarðarkringlunni. Ein dóttir hans er búsett í Berlín ásamt fjölskyldu og önnur er staðsett í Noregi.

„Ég ætlaði að vísu ekki að halda upp á afmælið en þegar ég frétti að þau væru að koma ákvað ég að halda veislu,“ segir Gunnar.

Börn Gunnars eru alls fimm en síðast er hann átti stórafmæli ákvað hann að bjóða öllum í ferð á Pýrenaskagann. Þá voru afkvæmin enn dreifðari og sá afmælisbarnið þann kost vænstan að bjóða öllum, börnum og barnabörnum, í ferðina.

„Þetta var í júlí 2007 og ég tók þá ákvörðun að selja öll hlutabréfin mín í Kaupþingi og bjóða öllum með. Ég held að þetta hafi verið hárréttur tími til að eiga afmæli því bréfin voru þá í hæstu hæðum,“ segir Gunnar og hlær. Þá voru börn hans enn dreifðari, allt frá Tromsö til Mílanó.

Fögnuðinum vegna áttræðisafmælisins lauk síðan í gær. Þá héldu Gunnar og Egill, næstyngsti sonur hans, upp á sameiginlegt 130 ára afmæli með tónleikum í Áskirkju.

„Egill varð fimmtugur í fyrra og ætlaði að halda tónleikana þá en þurfti að slá þeim á frest. Við ákváðum því að gera þetta svona þegar í ljós kom að fólkið okkar var að koma frá útlöndum,“ segir Gunnar.

Á tónleikunum var boðið upp á verk eftir Egil en sá er tónskáld. Meðal þeirra sem komu fram voru Gissur Páll, kórinn Hljómeyki að ógleymdum öðrum kór sem kallast Silfur Egils. „Það nafn var komið löngu áður en sjónvarpsþátturinn kom til sögunnar,“ segir Gunnar og hlær á ný.

Afmælistónleikarnir eru heldur ekki í fyrsta sinn sem Gunnar slær afmælum saman. Það gerðu hann og eiginkona hans heitin þegar þau urðu fertug svo úr varð áttatíu ára afmæli. Fimmtugsafmælið var haldið í Noregi og sextugsafmælið í Grímsnesi. „Það hefur alltaf verið rosalega gaman í afmælinu mínu en sérstaklega í Vatnsholti í fyrradag,“ segir Gunnar að lokum.