Forseti Íslands, Guðni Th. Jóhannesson, hefur sent frá sér yfirlýsingu vegna undirskriftar hans á skipunarbréfi 15 dómara við Landsrétt. Forsetanum barst skipunarbréfið fyrir tveimur sólarhringum. Hann tekur sérstaklega fram í yfirlýsingunni að hann hafi þurft að kynna sér málið vandlega. Hann hafi aflað staðfestingar á framvindu málsins og hvort ekki hefði verið staðið rétt að atkvæðagreiðslunni. Fól hann forsetraritara að afla upplýsinga frá skrifstofu Alþingis um málið.

Í greinargerð frá skrifstofu Alþingis, sem forseta barst og vitnað er til í yfirlýsingunni,  kom fram að atkvæðagreiðslan hafi verið lögmæt.  Ráðherra hafi lagt fram tillögur um dómarana og farið eftir lögum. Þá hafi stjórnskipunar- og eftirlitsnefnd einnig lagt fram þingskjal þar sem gerð var tillaga um hvern dómara fyrir sig í tölusettum liðum. Forsetinn átti einnig í samtölum við formenn og forystufólk flokkanna þar sem kom fram að þingmenn flokkanna hefðu ekki andmælt fyrirkomulagi atkvæðagreiðslunnar.

„Fyrir liggur að enginn hreyfði andmælum við því á þingfundi eða við undirbúning atkvæðagreiðslunnar að greidd yrðu atkvæði í einu lagi um alla 15 töluliði þingskjalsins,“ segir í yfirlýsingunni.

Umdeilt mál

Forsetinn vitnar í yfirlýsingunni til þess að málið hafi verið umdeilt og mikið í umræðunni. Meðal annars hafi það verið gagnrýnt hvernig ráðherra stóð að málinu og nefnt hafi verið að kosið skyldi um hvert dómaraefni fyrir sig en ekki tillöguna sjálfa í heilu lagi.

Yfirlýsingin vitnar til þess að undirskriftarsöfnun hafi hafist á netinu sem hafi hvatt forsetann til að skrifa ekki undir skipunarbréf dómarana 15 á þeim forsendum að ekki hafi verið staðið rétt að atkvæðagreiðslunni. Þá hafi Jón Þór Ólafsson, þriðji varaforseti  Alþingis einnig haft samband við forsetann og lýst yfir efasemdum sínum um málið. Forsetinn ákvað þó að lokum að skrifa undir skipunarbréfið.

„Með hliðsjón af öllum þeim málavöxtum sem hér hafa verið raktir komst ég að þeirri niðurstöðu að mistök hefðu ekki átt sér stað við undirbúning og tilhögun atkvæðagreiðslunnar 1. júní og hún hefði verið í samræmi við lög, þingvenju og þingsköp,“ segir forsetinn í yfirlýsingunni.

Hér má sjá yfirlýsinguna í heild sinni.