Dómstóla þarf til að skera úr um hvort Ríkisskattstjóri fái upptökur við hraðbanka

Ríkisskattstjóri þarf að leita til dómstóla til þess að láta skera úr ágreiningi um hvort að Arion banka sé heimilt að afhenda embættinu tilteknar upptökur úr eftirlitsmyndavélum í þágu skatteftirlits.

Þetta er álit Persónuverndar eftir að Ríkisskattstjóri fór fram á það við Arion banka að bankinn afhenti upptökur úr eftirlitsmyndavélum sem staðsettar eru við hraðbanka bankans. Óskað var eftir áliti Persónuverndar á því hvort að slík afhending væri heimil.

Svo virðist sem að Ríkisskattstjóri hafi viljað fá upplýsingar um eigendur kreditkorta sem eingöngu hafi verið notuð í viðskiptum sem ekki voru „rekjanleg með öðrum hætti.“ Tekið var fram að þær myndbandsupptökur sem óskað var eftir innihaldi ekki upplýsingar um aðila sem embættið grunaði um refisvert brot.

Að mati Ríkisskattstjóra væru þær upplýsingar sem kæmu fram á myndbandsupptökunum almennar en ekki viðkvæmar persónuupplýsingar og því ætti bankanum að vera heimilt að afhenda upptökurnar.

Taldi Ríkisskattstjóri að ef upplýsingaöflun Ríkisskattstjóra sætti takmörkunum, til dæmis vegna þess að honum væri ekki heimilt að fá afhentar upptökur úr eftirlitsmyndavélum væri að mati embættisins „ekki séð hvernig unnt verði að sinna sem skyldi lögbundnu hlutverki um skatteftirlit.“

Þá taldi Ríkisskattstjóri að myndirnar sem óskað væri eftir samsvöruðu því eftirliti sem viðhaft væri á vettvangi, hvort heldur þegar menn væru spurðir nafns, skilríkja eða annarra auðkenna, þegar verið væri að kanna og afla upplýsinga um skattskil viðkomandi.

Láti kanna hvort að lög um tekjuskatt gangi framar ákvæði í lögum um persónuvernd

Í áliti Persónuverndar kemur fram að það væri mat stofnunarinnar að þegar Ríkisskattstjóri tekur til rannsóknar mál í tengslum við skatteftirlit hljóti slíkt eftirlit að fara fram vegna rökstudds gruns um brot gegn skattalögum og að slíkar upplýsingar væru viðkvæmar persónuupplýsingar.

Þar kemur einnig fram að í lögum segi að ef uppi komi ágreiningur varðandi það hvort Ríkisskattstjóri eigi rétt á aðgangi að tilteknum upplýsingum skuli bera ágreininginn undir dómstóla.

Þá segir einnig að Persónuvernd hafi í tvígang, árið 2009 og 2016, lýst yfir þeirri afstöðu að lög heimili ekki Ríkisskattstjóra að söfnun myndefnis með viðkvæmum persónuupplýsingum úr eftirlitsmyndavélum, enda mæla lögin fyrir um að aðeins megi afhenda slíkt myndefni lögreglu.

Þar sem fyrir liggi að þær upplýsingar sem Ríkisskattstjóri óski eftir innihaldi viðkvæmar upplýsingar og að stofnunin fari ekki með lögregluvald telur Persónuvernd að Ríkiskattstjóri þurfi að leita til dómstóla til að skera úr um hvort að heimild í lögum um tekjuskatt, þar sem mælt er fyrir heimildir skattyfirvalda til upplýsingaöflunar, gangi framar lögum um persónuvernd.