„Einhver sú kolvitlausasta fýlubomba sem ég hef séð“

„Ég er búinn að vera hérna á þingi í næstum því fjórtán ár og þetta er nú einhver sú kolvitlausasta fýlubomba sem ég hef séð stjórnarandstöðu reyna að sprengja í þessum sal,“ sagði Birgir Ármannsson, þingflokksformaður Sjálfstæðisflokks, um málflutning stjórnarandstöðunnar á þingi í dag.

Stjórnarandstöðuþingmenn gagnrýndu þingmenn Viðreisnar og Bjartrar framtíðar fyrir að hafa ekki tekið þátt í sérstökum umræðum í gær um tvær skýrslur sem fjalla um eignir Íslendinga á aflandssvæðum og um niðurfærslu verðtryggðra fasteignalána.  

Skýrslan var unnið að beiðni Bjarna Benediktssonar forsætisráðherra en stjórnarandstaðan hefur sakað hann um að hafa setið á skýrslunum fram yfir kosningar.

Svandís Svavarsdóttir, þingflokksformaður Vinstri grænna, sagði það alvarlegt að tveir stjórnarflokkar taki ekki þátt í umræðum um stórpólitísk mál, og bað forseta Alþingis að taka þessi mál upp á fundi þingflokksformanna.  

„Þakka þér fyrir hv. þingmaður Svandís Svavarsdóttir, fyrir að gefa mér orð í þessu. Því þessi furðulega uppákoma, að allir þingflokksformenn stjórnarandstöðunnar og sjö eða átta eða hvað það er þingmenn til viðbótar komi daginn eftir til að kvarta yfir fjarveru einhverra flokka úr sérstakri umræðu daginn áður, það er einhver furðulegasta fýlubomba sem ég hef séð [...] Ég get ekki sagt neitt annað. Ef málefnaþurrð stjórnarandstöðunnar er með þessum hætti er það átakanlegt,“ sagði Birgir.

Sigurður Ingi Jóhannsson, þingmaður Framsóknarflokks, sagði fýluna líklega skýrast af málefnaþurrð ríkisstjórnarinnar, frekar heldur en stjórnarandstöðunnar.

„Ég tek eftir því að það er stuð á þingflokksformanni Sjálfstæðisflokksins í dag. Ég get vel skilið að hann reyni að breiða yfir það að á dagskránni í dag eru ágæt mál, sérstök umræða, sem ég vona að sem flestir taki þátt í, mál frá nefnd og síðan ein fjögur mál frá þingmönnum. Það er með öðrum orðum ekkert frá ríkisstjórninni. Fýla stjórnarandstöðunnar er þá kannski aðallega út af því að hún hefur ekki nóg fyrir stafni, málefnaþurrðin, hún hefur ekkert til þess að veita ríkisstjórninni aðhald við vegna þess að það eru bara þingmannamál á dagskrá. Við tökum vonandi öll þátt í því,“ sagði Sigurður Ingi.