BBC biðst afsökunar á umdeildri færslu um guðlast

Breska ríkisútvarpið baðst í dag afsökunar á færslu á asískri samfélagsmiðlasíðu sinni þar sem lesendur voru spurðir hver þeim þætti „rétta refsingin“ við guðlasti eiga að vera.

Færslan átti að vekja athygli á þætti ríkisútvarpsins þar sem meðal annars var fjallað um stjórnvöld í Pakistan og viðhorf þeirra gagnvart guðlasti. Þar í landi getur dauðarefsing legið við guðlasti og Nawaz Sharíf forsætisráðherra hefur kallað eftir því að tekið verði harðar á því á samfélagsmiðlum.

Færsla breska ríkisútvarpsins hitti alls ekki í mark og var gagnrýnd af baráttumönnum fyrir auknum mannréttindum í Mið-Austurlöndum sem sögðu hana gefa í skyn að refsingar við guðlasti ættu einhvern tímann við.

Disgraceful that @bbcasiannetwork @ShaziaAwan would ask what 'punishment' should be for blasphemy. You know people get killed for it.

— Maryam Namazie (@MaryamNamazie) March 17, 2017

Í afsökunarbeiðni ríkisútvarpsins kom fram að spurningin hefði átt að vera ögrandi en að hún hefði ekki verið nógu vel orðuð.

Bretar felldu bann gegn guðlasti úr gildi árið 2009 og Íslendingar árið 2015. Einn núlifandi Íslendingur hefur hlotið dóm fyrir guðlast en það var Úlfar Þormóðsson, þáverandi ritstjóri tímaritsins Spegilsins, árið 1983.