Zlatan yfirgefur PSG: "Kom sem kóngur, fer sem goðsögn“

Zlatan Ibrahimovic er á leið frá franska meistaraliðinu Paris Saint-Germain en þetta tilkynnti hann sjálfur í alls ekki svo hógværi Twitter-færslu í morgun.

Hann birti mynd af Parc des Princes, heimavelli PSG, og skrifaði: „Síðasti leikurinn á Parc des Princes á morgun. Ég kom sem kóngur en fer sem goðsögn.“

Svíinn magnaði, sem verður 35 ára í október, hefur spilað með PSG síðan 2012 og orðið meistari öll fjögur tímabilin. Síðasti leikur hans verður gegn Nantes, liði íslenska landsliðsmannsins Kolbeins Sigþórssonar.

My last game tomorrow at Parc des Princes. I came like a king, left like a legend pic.twitter.com/OpLL3wzKh0

— Zlatan Ibrahimović (@Ibra_official) May 13, 2016

Hann hefur aldrei spilað betur en á þessari leiktíð en Zlatan er búinn að skora 36 deildarmörk í 30 leikjum og í heildina 46 mörk í 49 leikjum.

Frá því Zlatan kom til Paris Saint-Germain hefur hann spilað 178 leiki í öllum keppnum og skorað 152 mörk.

Hvað tekur við hjá Zlatan er óvíst en ljóst er að mörg lið hafa áhuga á að fá þennan magnaða framherja í sínar raðir.

Á löngum og farsælum ferli hefur Zlatan unnið þrettán landstitla í Hollandi, Ítalíu, Spáni og í Frakklandi.