Klopp skilur ekki leikmenn sem elta Kínagullið

Jürgen Klopp, knattspyrnustjóri Liverpool, undrar sig á því að leikmenn fari til Kína til að spila fótbolta. Hann segir að eina ástæðan fyrir því séu þeir miklu peningar sem eru í umferð í Kína.

Brasilíumaðurinn Oscar var í gær kynntur sem leikmaður Shanghai SIPG en kínverska liðið borgaði Chelsea 52 milljónir punda fyrir leikmanninn.

Oscar, sem er 25 ára, fær 400.000 pund í vikulaun hjá Shanghai, sem gerir hann að launahæsta leikmanni heims.

„Ég hef ekki hugmynd af hverju fólk tekur svona ákvarðanir. Fyrir mér er þetta ekki möguleiki. Eins og staðan er í dag er þetta ekki deild sem þú vilt í alvörunni spila í. Liðin þarna geta bara fengið leikmenn með því að borga háar fjárhæðir,“ sagði Klopp.

„Sum félög í Evrópu hafa svipaðar hugmyndir um England. Peningarnir kaupa bestu leikmennina. Ef leikmaður ákveður að fara til Kína er venjulega farið að síga á seinni hluta ferilsins. Í öllum stóru deildunum í Evrópu þénar þú nógu mikið,“ bætti Þjóðverjinn við.