Sjáðu hvernig Selfyssingar fóru að því að slá KR-ingana út í gær | Myndband

KR-ingar eru dottnir út úr bikarnum og það eru ekki kominn júní. Mesta bikarlið á Íslandi síðustu árin fékk óvæntan og sögulegan skell á móti Selfossi í gærkvöldi og það á sínum eigin heimavelli.

1. deildarlið Selfoss, sem hafði tapað tveimur leikjum í röð í Inkasso-deildinni án þess að skora vann 2-1 sigur í framlengingu þar sem hinn 19 ára gamli Arnar Logi Sveinsson skoraði sigurmarkið á 116. mínútu.

KR hafði aldrei tapað í 32 liða úrslitum bikarsins og hafði ekki dottið út fyrir neðrideildarliði í 24 ár. Síðast bikartap KR-inga á KR-vellinum á undan þessu kom eftir vítaspyrnukeppni á móti Val í sextán liða úrslitunum árið 2007.

Frá því tapi höfðu KR-ingar unnið alla þrettán heimaleiki sína í bikarnum og komist í undanúrslitin átta ár í röð.

Denis Fazlagic hafði komið KR yfir á 61. mínútu en James Mack jafnaði fyrir Selfoss tíu mínútum síðar. Það varð því að framlengja og sigurmark Selfyssinga kom aðeins fjórum mínútum fyrir lok framlengingarinnar en þá voru margir farnir að búast við vítaspyrnukeppni. Arnar Logi Sveinsson var hinsvegar á öðru máli og skoraði eitt eftirminnilegasta markið í sögu fótboltaliðs Selfoss.

Borgunarmörkin verða á Stöð 2 Sport klukkan 22.00 í kvöld og þar verða sýnd öll mörkin úr leikjum 32 liða úrslitanna sem lýkur með þremur leikjum í kvöld.

Einn leikja kvöldsins, sá á milli toppliðs Stjörnunnar og spútnikliðs Víkings úr Ólafsvík, verður sýndur beint á Stöð 2 Sport og hefst útsendingin frá honum klukkan 19.50.

Það verður auðvitað fjallað um leik Selfoss og KR í Borgunarmörkunum í kvöld en Vísir gefur lesendum sínum smá forsmekk á sæluna með því að sýna mörkin á KR-vellinum í gærkvöldi. Það er hægt að sjá þau í spilaranum hér fyrir ofan.