Fanney setti nýtt Íslandsmet í bekkpressu

Evrópumeistarinn Fanney Hauksdóttir úr Gróttu setti nýtt Íslandsmet í dag þegar hún tryggði sér Íslandsmeistaratitilinn í klassískri bekkpressu í íþróttahúsi Kennaraháskólans.

Nokkur afföll urðu úr hópi bæði keppenda og starfmanna vegna veikinda, en á endanum luku 28 keppendur móti, sumir þaulreyndir en aðrir stigu í dag sín fyrstu skref á keppnispall. Keppnin var bæði hörð og spennandi og féllu mörg met.

Í kvennaflokki sigraði Fanney Hauksdóttir úr Gróttu með því að lyfta 105 kílóum sem er nýtt Íslandsmet  í -63 kg flokki . Þessi metlyfta hennar  gaf Fanneyju 114,1 stig.

Fanney er á leið á HM í bekkpressu í Danmörku nú í apríl og keppir líka á HM í klassískri bekkpressu í maí. Það er því ljóst á þessari frammistöðu hennar í dag að undirbúningurinn gengur vel. Stigahæsta liðið í kvennaflokki var lið Gróttu

Í karlaflokki lágu úrslit ekki fyrir fyrr en eftir síðustu lyftu, en þá lyfti Viktor Samúelsson úr KFA, 205 kg í -120 kg flokki og fékk fyrir það 117,9 stig. Þar með marði hann sigur á Ingimundi Björgvinssyni úr Gróttu, sem fékk 117,0 stig fyrir 195 kg í -105 kg flokki. Viktor fer líka á HM í apríl þar sem hann keppir í búnaði. Í karlaflokki fékk lið KFA flest stig.



Lokastaðan í kvennaflokki:

1. Fanney Hauksdóttir, Gróttu 114,1 stig

2. Árdís Ósk Steinarsdóttir, Ármanni 80,5 stig

3. Arnhildur Anna Árnadóttir, Gróttu 78,4 stig

4. Laufey Agnarsdóttir, Gróttu 78,1 stig

5. Matthildur Óskarsdóttir, Gróttu 76,5 stig

Lokastaðan í karlaflokki:

1. Viktor Samúelsson, KFA 117,9 stig

2. Ingimundur Björgvinsson, Gróttu 117,0 stig

3. Einar Örn Guðnason, Akranes 111,2 stig

4. Jón Einarsson, Ármanni  105,2 stig

5. Finnur Freyr Eiríksson, Gróttu 103,1 stig