Leik Belga og Portúgala aflýst

Belgíska knattspyrnusambandið tilkynnti í dag að búið væri að aflýsa vináttulandsleik Belga og Portúgala sem átti að fara fram á þriðjudag.

Það voru borgaryfirvöld í Brussel sem fóru fram á að leiknum væri aflýst enda upplausnarástand í borginni eftir hryðjuverkaárásirnar í gær.

Belgarnir voru fljótir að aflýsa æfingu í gær og strax þá var orðið ljóst að líklega yrði ekki af leiknum.

Leikur Hollands og Frakklands í Amsterdam mun fara fram á föstudag en það var skoðað að aflýsa þeim leik líka.