Kröfu um nálgunarbann hafnað

Hæstiréttur staðfesti í dag úrskurð héraðsdóms þar sem því var hafnað að staðfesta úrskurð lögreglustjórans á höfuðborgarsvæðinu að karlmaður sætti nálgunarbanni gagnvart barnsmóður sinni, kærasta hennar og systur. Farið hafði verið fram á hálfs árs nálgunarbann.

Maðurinn hefur verið ákærður fyrir líkamsárás gegn konunni frá því í febrúar í fyrra. Þá hefur hann einnig verið ákærður fyrir að hóta henni í maí og júní sama ár. Það mál er nú fyrir dómstólum.

Í beiðni lögreglustjórans kom fram að maðurinn sé að auki grunaður um að hafa skorið á hjólbarða bifreiðar konunnar auk þess að hafa hótað henni lífláti. Þá sendi hann kærasta hennar og systur myndband af sér og konunni í kynlífsathöfnum og hótaði að ef konan borgaði honum ekki ríflega myndi myndbandið fara í dreifingu.

Í niðurstöðu héraðsdóms, sem, líkt og áður segir, var staðfest í Hæstarétti, segir að ekki sé unnt að skilja efni skilaboða mannsins á þann hátt að um líflátshótun sé að ræða. Nálgunarbanni verði aðeins beitt þegar ekki þykir sennilegt að friðhelgi brotaþola verði vernduð með öðrum og vægari hætti.

„Varnaraðili er nú grunaður um að hafa valdið eignaspjöllum á bifreiðum [barnsmóður sinnar og kærasta hennar] með því að stinga á hjólbarða bifreiðanna og eru kærur þeirra af því tilefni til rannsóknar og meðferðar hjá lögreglu. Eignaspjöll af þessu tagi geta falið í sér ögrun, en þau veita þó ekki þá rökstuddu vísbendingu um hættu á brotum gegn eigendum bifreiðanna að tilefni sé til ákvörðunar um nálgunarbann,“ segir í úrskurði héraðsdóms.

Einnig felist ekki í myndbandssendingunni sem gefi tilefni til að maðurinn sæti nálgunarbanni gagnvart kærasta konunnar eða systur. Aðrar leiðir séu til að verjast slíkum sendingum og engin vernd gegn slíku felist í nálgunarbanninu.