Jóhann Berg skoraði en Charlton enn á botninum | Aron Einar varamaður

Jóhann Berg Guðmundsson skoraði sitt þriðja deildarmark fyrir Charlton er liðið tapaði, 2-1, fyrir Preston North End í ensku B-deildinni í kvöld.

Jóhann Berg skoraði markið á 37. mínútu, tveimur mínútum eftir að Preston hafði komist yfir í leiknum. Heimamenn tryggðu sér svo sigur með marki snemma í síðari hálfleik.

Aron Einar Gunnarsson var á bekknum hjá Cardiff City sem tapaði fyrir Middlesbrough, 3-1. Aron Einar kom inn á sem varamaður á 82. mínútu.

Þá spilaði Björn Bergmann Sigurðarson allan leikinn í sóknarlínu Wolves sem tapaði á útivelli fyrir Brentford, 3-0.

Charlton er enn í neðsta sæti B-deildarinnar með 25 stig og er nú sjö stigum frá öruggu sæti. Wolves er í fimmtánda sætinu með 40 stig og Cardiff í áttunda sæti með 49 stig.