Hjólar í Íslandsvin og hommahatara

„Málflutningur þessa manns er hreint mannhatur. Ógeðslegasta birtingarmynd skipulagðra trúarbragða,“ segir tónlistarmaðurinn Páll Óskar Hjálmtýsson um nýjasta útspil Íslandsvinarins Franklin Graham.

Graham, sem starfrækir eigin kristniboðssamtök og er vel þekktur fyrir afstöðu sína til samkynhneigðra, steig skrefi lengra í nýlegu viðtali þar sem hann segir samkynhneigða óvininn sem eigi að henda út úr kirkjunni.

Sjá einnig:Panta sér miða en ætla ekki að mæta

Undir liðnum spurt og svarað í útvarpsþættinum Focus on the Family sagði hann að óvininum, samkynhneigð, hefði verið hleypt inn í kirkjur. Hann hefði rætt við kristna kollega sína sem lýstu fyrir honum hvernig samkynhneigðum börnum hefði verið boðið í kirkjuna og inn á heimili í þeirri von að hægt væri að hafa áhrif á kynhneigð þeirra.

„Ég hugsaði með sjálfum mér, þeim tekst ekki að hafa nein áhrif á krakkana. Krakkarnir munu hins vegar hafa áhrif á foreldra barnanna,“ sagði Graham.

Hægt er að hlusta á ummæli Graham hér að neðan.

Bætti hann við að þó að kristnir telji sig geta barist gegn samkynhneigð með bros á vör þá yrði fólk að skilja hver óvinurinn væri og hvað hann ætlaði sér. Samkynhneigðir ætli að taka yfir heimilin og þjóðina.

„Við verðum að passa í hvaða félagsskap börnin okkar eru.“

Fréttatilkynning fjarlægð af vef Þjóðkirkjunnar

Uppi varð fótur og fit árið 2013 þegar út spurðist að Graham væri á leið til Íslands á vegum kristinna samtaka hér á landi. Var hann gestur á svonefndri Hátíð vonar og birti Þjóðkirkjan tilkynningu um komu Graham til landsins á heimasíðu sinni.

Sjá einnig:Graham hrósar Vladímír Pútín

Í kjölfarið braust út mikil reiði hjá stórum hluta samfélagsins sem taldi Þjóðkirkjuna ekki eiga að koma að heimsókn Graham. Baðst Þjóðkirkjan afsökunar á því að hafa birt tilkynninguna og ítrekaði afstöðu sína til samkynhneigðra. Hins vegar dró Þjóðkirkjan ekki til baka stuðning sinn við hátíðina. Agnes Sigurðardóttir, biskup Íslands, var einn þeirra sem ávarpaði hátíðina í Laugardalshöll.

Graham kom engu að síður til landsins og flutti erindi í Laugardalshöll við mikla hrifningu hátíðargesta. Uppselt var á hátíðina en reyndar var aðgangur ókeypis.

Erindi Graham má sjá hér að neðan.

Vill vita hvort biskup og félagar séu stolt

Páll Óskar hvetur vini sína á Facebook til þess að senda nýleg ummæli Graham áfram á biskup Íslands „eða einhverja aðra grúppíu hans úr þjóðkirkjunni.

Hann vilji vita hvort þau séu stolt af því að hafa varið komu Graham til landsins.

Þessi gaur var aðal stjarnan á "Hátìð vonar" ì Höllini 2013. Er einhver hèrna sem þekkir biskup Ìslands, eða einhverja a...

Posted by Páll Óskar on Tuesday, January 26, 2016

Graham sótti biskup heim á Biskupsstofu í tengslum við hátíðina. Þar gerði hún Graham grein fyrir afstöðu þjóðkirkjunnar til samkynhneigðra.

„Á fundinum gerði ég honum grein fyrir stöðu þjóðkirkjunnar sem starfar um land allt, er opin öllum landsmönnum og þjónar öllum,“ skrifaði biskup í pistli, sem sagði Graham jafnframt að kirkjan hafi tekið skýra afstöðu með samkynhneigðum og réttindabaráttu þeirra.

Pistil biskups eftir heimsókn Graham má sjá hér að neðan.

Í dag kom Franklin Graham, ásamt fylgdarliði, í heimsókn til mín á Biskupsstofu. Hann sagði mér frá starfi sínu og Billy...

Posted by Biskup Íslands on Thursday, September 26, 2013