Umfjöllun: Tveggja marka tap í Caen

Íslaenska landsliðið í knattspyrnu skipað leikmönnum 21 árs og yngri tapaði 2-0 gegn Frakklandi í undankeppni EM U21-liða, en leikið var í Caen í dag.

Corentin Tolisso skoraði bæði mörk Frakklands, en mörkin komu í sitthvorum hálfleiknum. Ísland átti í miklum erfiðleikum í leiknum og voru úrslitin sanngjörn.

Frakkarnir byrjuðu betur og Rúnar Alex Rúnarsson, markvörður Íslands, varði vel frá stórstjörnunni frá PSG, Adrien Rabiot, á sjöttu mínútu.

Rúnar Alex kom engum vörnum við fimm mínútum síðar þegar Corentin Tolisso batt endahnút á hraða skyndisókn Frakka sem kom eftir innkast Íslands á vallarhelmingi Frakklands. Slysalegt.

Eftir markið þjörmuðu Frakkarnir að íslenska liðinu, en náðu ekki að koma inn marki og staðan var því 1-0, Frökkum í vil, þegar liðin gengu til búningsherbergja í hálfleik.

Í síðari hálfleik héldu Frakkarnir áfram að þjarma að marki Íslands og á 62. mínútu skoraði Tolisso annað mark sitt og annað mark Frakka með skalla eftir undirbúning Rabiot.

Skömmu síðar fékk Ísland sitt langbesta færi í leiknum þegar Aron Elís Þrándarson fékk gott skotfæri af vítateignum, en skotið fór naumlega framhjá.

Eftir það fjaraði leikurinn dálítið út, en Ísland fékk fínt færi þegar varamennirnir Albert Guðmundsson og Óttar Magnús Karlsson áttu laglegt samspil áður en Albert lagði boltann í hliðarnetið úr þröngu færi.

Heimamenn hefðu hæglega getað bætt við fleiri mörkum, en Rúnar Alex átti góðan leik í íslenska markinu og varði meðal annars tvisvar mjög vel. Lokatölur 2-0.

Ísland er því í þriðja sæti riðilsins eftir átta leiki með 15 stig. Frakkarnir eru í öðru sætinu með 17 stig eftir níu leiki, en Makedónía er á toppnum með 18 stig eftir níu leiki.

Lokaleikir Íslands í riðlinum eru í október, en fimmta október þá mæta þeir Skotlandi og áttunda október mæta þeir Úkraínu. Báðir leikirnir verða leiknir á Íslandi, en með sigri í þeim báðum tryggir Ísland sér sæti á Evrópumótinu í Póllandi næsta sumar.