Auðveldara að skipuleggja ófrið en frið

Jón Gnarr fyrrverandi borgarstjóri segir auðveldara að skipuleggja ófrið en frið en í morgun var skrifað undir samstarfssamning um friðarsetur í Reykjavík þar sem hann verður í formennsku ráðgjafanefndar. Stefnt er að því að setrið taki til starfa næsta haust.

Borgarstjóri og rektor Háskóla Íslands skrifuðu í morgun undir samstarfssamning um undirbúning stofnunar friðarseturs í Reykjavík sem verður hýst innan Alþjóðamálastofnunar Háskóla Íslands.

Sérstök ráðgjafanefnd hefur verið skipuð undir formennsku Jóns Gnarr en með honum í nefndinnni eru Silja Bára Ómarsdóttir fyrir hönd Háskólans og Svanhildur Konráðsdóttir fyrir hönd borgarinnar. Á blaðamannafundi í morgun kom fram að þetta verkefni hefði verið í undirbúningi í nokkur ár eða allt frá því Jón var borgarstjóri.

Á næsta ári verða þrjátíu ár frá því leiðtogafundurinn frægi var haldinn í Höfða og í dag er skrifað undir samning um stofnun friðarsetur í sama húsi.

Hvers vegna friðarsetur í Reykjavík?

„Við höfum verið að sinna friðarmálum á undanförnum árum en núna viljum við leiða saman hesta. Nýta þau tækifæri sem eru og dýpka kannski umræðuna og láta hana ná víðar út í samfélagið,“ sagði Dagur B. Eggertsson borgarstjóri.

Jón, þetta er verkefni sem þér hefur verið hugleikið lengi, frá því þú varst borgarstjóri?

„Já virkilega og bara alla tíð. Mér hefur alltaf langað að vita og finna út hvernig maður skipuleggur frið. Hvernig organiserarmaður frið eins og fólki gengur svo vel að organisera ófrið,“ sagði Jón Gnarr.

Kristín Ingólfsdóttir háskólarektor segir þetta verkefni hafa mikla þýðingu fyrir Háskólann. „Vegna þess að þar er mikil reynsla bæði af þverfaglegri samvinnu og alþjóðlegri samvinnu og hvoru tveggja er mjög mikilvægt í þessari samvinnu. Þannig að þegar reynsluheimur Alþjóðamálastofnunar og borgarinnar; þegar þessir kraftar sameinast held ég að góðir hlutir geti gerst,“ sagði Kristín.

Reykjavíkurborg leggur verkefninu til startfé

„Hugmyndin er svo að safna bæði rannsóknarstyrkjum , búa til alþjóðleg samstarfsverkefni , þannig að fé kæmi bæði héðan og þaðan,“ sagði Dagur.

Jón, þú ert handhafi Lennon-Ono friðarverðlaunanna, All You Need is Love?

„Já, en þú verður fyrst að skilja hvað Love er,“ sagði borgarstjórinn fyrrverandi og hló við með sínum alþekkta tvíræða hætti.