Maður á að gera það sem mann langar til

„Mig hefur alltaf langað til þess að gera svo margt, svo langaði mig bara að gera þetta þannig að ég ákvað bara að slá til,“ segir Ásrún Mjöll Stefánsdóttir sem ætlar að fara á mótorhjóli í kringum landið í byrjun næsta mánaðar en prófið tók hún í lok síðasta sumars.

„Mig langaði rosalega að fara einhverja langa ferð og ákvað að hjóla hringinn og fara á Eistnaflug í leiðinni. Ég er búin að kaupa miða svo núna vona ég bara að það verði gott veður,“ segir hún hress og hlær.

„Mig langar til þess að gefa mér kannski svona viku til tíu daga til að fara hringinn en það kemur bara í ljós eftir veðri hvað ég ákveð að gera. Það er svo margt flott að skoða á leiðinni.“

Ásrún er ekki enn sem komið er meðlimur í neinum mótorhjólaklúbb en er þrátt fyrir það búin að kynnast fólki með viðlíka áhugamál.

„Þetta er alveg rosalega gaman og ég er búin að kynnast fullt af skemmtilegu fólki í gegnum þetta. Mótorhjólamenn eru allir svo vinalegir, þetta er alveg frábært fólk upp til hópa,“ segir Ásrún en hjólið keypti hún sér síðastliðið vor.

„Ég keypti mér Honda Shadow-hjól. Maðurinn sem ég keypti það af var búinn að gera það vel upp þannig að ég var mjög þakklát fyrir það og er mjög ánægð með það.“

Auk mótorhjólaáhugans hefur Ásrún mikinn áhuga á klifri og vinnur í Klifurhúsinu auk þess sem hún stundar nám í húsasmíði og vélstjórn í Tækniskólanum.

„Mig hefur lengi langað til þess að vera bóndi. Ég fór alltaf í sveit undir Eyjafjöllum og finnst rosa gott að vera þar. Svo lá vegurinn bara að þessu. Að smíða og vélstjórnin kom svo einhvern veginn eftir á. Það er svo gott að geta bjargað sér svona sjálfur þannig að þetta small bara saman,“ segir hún um ástæður þess að hún ákvað að fara í húsasmíða- og vélstjórnarnám. Hún segir fólk stundum verða örlítið undrandi á námsvali hennar en kippir sér ekkert upp við það.

„Ég fæ alveg oft furðulegt augnatillit frá fólki og það verður oft hissa þegar ég segi því frá náminu. En maður á bara að gera það sem mann langar mest til að gera og það sem gerir mann hamingjusaman,“ segir hún glöð í bragði.

Hún hefur ekki enn ákveðið hvar á landinu hana langar mest til þess að eiga bóndabæ og segir að hægt sé að finna fallega staði alls staðar. „Núna þarf ég bara að safna mér fyrir bóndabæ en ég hef langan tíma til þess að safna þannig að það er allt í lagi,“ segir hún hlæjandi að lokum.