Tónlist

Á vissum tímapunkti frussurigndi hundaslefi

Gyða Lóa Ólafsdóttir skrifar
Líkt og sjá má á þessari mynd var talsvert þröngt í blæjubílnum, en fullvaxta karlkyns sankti bernharðshundur er 77-100 kíló að þyngd.
Líkt og sjá má á þessari mynd var talsvert þröngt í blæjubílnum, en fullvaxta karlkyns sankti bernharðshundur er 77-100 kíló að þyngd. Mynd/KjartanHreinsson
Þrír stæðilegir sankti bernharðshundar vöktu athygli í nýju myndbandi við Brennum allt með hljómsveitinni Úlfur Úlfur en lagið má finna á nýútkominni breiðskífu hennar, Tveimur plánetum.

Hundarnir, sem heita Igor, JR og Gucci, sjást í myndbandinu þeytast um í blæjubíl og í göngutúr með rapparanum Kött Grá Pje en lagið er unnið í samstarfi við hann.

Hann ber hundunum vel söguna og segir þá prýðis samstarfsmenn þrátt fyrir talsverða munnvatnsframleiðslu.

„Fyrir mig var það ósköp átakalaust og að flestu leyti indælt,“ segir hann léttur um samstarfið. „Hins vegar slefuðu þeir mikið í hárið á mér. Á vissum tímapunktum svona frussurigndi yfir mig,“ segir hann glaður í bragði og auðheyrt er að það hefur ekki farið mikið fyrir brjóstið á honum.

„Það eina var að þeir komust eiginlega ekki fyrir í bílnum, það var mjög tæpt. En þeir voru mjög elskulegir og góðir. Felldu sig ágætlega við mig sem angaði allur af kattalykt,“ segir hann hress. „Mér fannst erfiðara að keyra þennan ægilega trukk heldur en að vera með hundunum.“

Upptökurnar stóðu yfir í nokkra tíma og var Guðný Vala Tryggvadóttir, eigandi hundanna og hundaræktunarinnar Sankti-Ice, á staðnum við upptökurnar ásamt aðstoðarkonu.

„Hún Guðný og konan sem var með henni eru rétt fyrir utan mynd allan tímann að gilligilla blessaða hundana til þess að halda þeim góðum,“ segir hann en auk þess að fara á rúnt í blæjubíl tóku hundarnir ríflegan göngutúr ásamt rapparanum og fengu því vafalítið talsverða hreyfingu út úr deginum.

Hér má sjá Guðnýju, Kött Grá Pje, hundana og leikstjórann Magnús Leifsson við upptökur.Mynd/KjartanHreinsson
Kött Grá Pje útlokar ekki að hann muni einhvern tíma fá sér sankti bernharðshund þótt það verði ekki í nánustu framtíð.

„Ég held að kisan mín yrði frekar óánægð með það. Ég á litla kisu sem er frek á mig. En ég gæti vel hugsað mér það einhvern tíma seinna þegar hún er orðin gömul og skeytingarlaus um mig því þeir voru algjört æði.“

Guðný Vala eignaðist sinn fyrsta sankti bernharðshund árið 1997, þá sautján ára gömul, og segir áhugann meðfæddan. 

Myndbandið, sem leikstýrt er af Magnúsi Leifssyni, er frumraun þeirra Igors, JR og Gucci fyrir framan tökuvélarnar. „Þetta var þeirra fyrsta tónlistarmyndband og vonandi ekki það síðasta,“ segir hún glöð í bragði.

Hún hælir sömuleiðis Kött Grá Pje og tekur undir að hann hafi þruft að þola talsvert slef við upptökurnar. „Það var svolítið heitt þarna og undir lokin voru þeir nú farnir að vera svolítið blautir eins og maður segir,“ segir hún hlæjandi og bætir við: „Hann var engin pempía, við getum alveg sagt það.“


Tengdar fréttir

Sumarlífið: Úlfur Úlfur með svakalegt útgáfupartý

Davíð Arnar Oddgeirsson og Ósk Gunnarsdóttir voru mætt með Sumarlífið í útgáfupartý á Loft Hostel. Úlfur Úlfur gaf út plötuna Tvær Plánetur í gær og einnig var myndband við lagið Brennum allt frumsýnt.






Fleiri fréttir

Sjá meira


×