Jákvæð afkoma sjötta árið í röð

Afkoma Strætó bs. var jákvæð um 370 milljónir árið 2014 samkvæmt ársreikningi sem samþykktur var af stjórn á fundi þann 27. febrúar síðastliðinn.

„Það að afkoman sé jákvæð enn eitt árið gerir okkur kleift að halda áfram að bæta og efla þjónustuna og vagnaflotann sem skilar sér í betri þjónustu,“ segir Jóhannes Rúnarsson, framkvæmdastjóri Strætó bs. „Farþegum okkar heldur áfram að fjölga líkt og undanfarin ár, sem er ánægjulegt.“

Þetta er sjötta árið í röð sem afkoma fyrirtækisins er jákvæð.

Farþegum Strætó fjölgaði um 4,4 prósent á árinu 2014 frá árinu á undan, eða úr rúmlega 9,8 milljónum í tæplega 10,3 milljónir. Tekjur af fargjöldum jukust hins vegar um 3,9 prósent, úr tæplega 1.421 milljón í tæpar 1.477 milljónir.

Afkoma fyrirtækisins er lakari árið 2014 en 2013 og skýrist það fyrst og fremst af því að framlag ríkisins var 80 milljónum króna lægra en árið áður.