Óþolandi lýðræði í krafti meirihlutans

„Það er óþolandi lýðræði og ekki í anda nýrra sveitarstjórnarlaga að tilnefning áheyrnarfulltrúa sé háð túlkun pólitískra andstæðinga,“ segir Kristinn Þór Jakobsson, eini bæjarfulltrúi Framsóknar í Reykjanesbæ, vegna umræðu um áheyrnarfulltrúa í ráðum og nefndum.

Líkt og fulltrúar minnihlutaframboða í Garðabæ gerðu eftir síðustu kosningar óskaði Kristinn eftir því að fá áheyrnarfulltrúa í ýmsum fagráðum Reykjanesbæjar en því var synjað. Hann segir ótækt að sveitarstjórnarlögin séu þannig að meirihlutinn í hverri sveitarstjórn geti ákveðið eftir sínum hentugleika hvort litlu framboðin fái áheyrnarfulltrúa eða ekki.

„Þannig að lýðræðið er háð túlkun meirihlutans. Það eru svona vinnubrögð sem koma í veg fyrir aukið lýðræði og gegnsæi og traust innan bæjarstjórnar.“

Að sögn Kristins missir hann af allri umræðu um flest mál því hún fari fram í fagráðunum áður en þau komi til bæjarstjórnar. „En ég kreisti það út að fá aðgang að öllum skjölum sem fylgja nefndarfundunum en þannig var það ekki áður.“

Gunnar Einarsson, bæjarstjóri í Garðabæ, sagði í samtali við fréttastofu í gær að launakostnaður og samskiptaörðugleikar við M-lista í Garðabæ væru ástæður þess að framboðið fengi ekki áheyrnarfulltrúa í nefndum bæjarins.

Þá bendir Gunnar á að engar fastmótaðar reglur séu um áheyrnarfulltrúa í lögum. „Í fyrsta lagi þá hefur lýðræðið talað og M-listinn hefur ekki fengið það kjörgengi að eiga fulltrúa í þessum nefndum. Í öðru lagi þá viljum við ekki blása út báknið. Síðan hefur þessi samstarfsvilji ekki verið til staðar við M-listann,“ segir Gunnar.