Finnst skemmtilegast að spila í sókn

Er einhver brekka nálægt þér þar sem þú getur rennt þér þegar snjórinn er, Hávar Darri? Ekki nálægt heimilinu mínu en það er brekka fyrir ofan skólann minn, Vatnsendaskóla í Kópavogi, og þar renni ég mér.

Finnst þér gaman í skólanum? Já, það er fínt.

Hver er uppáhaldsnámsgreinin þín? Þær eru tvær, íþróttir og stærðfræði.

Áttu gæludýr? Nei, en mig langar í hund.

Hvernig leikur þú þér mest? Ég leik mér mjög mikið í fótbolta og svo förum við vinirnir stundum saman í feluleik og eltingaleik.

Hvað er það skemmtilegasta sem þú gerir? Að fara í afmæli í Smáratívolí, í útilegur með fjölskyldunni, í GoKart og að æfa mig í fótbolta. Ég æfi hjá HK og er í 6. flokki. Mér finnst skemmtilegast að spila í sókn.

Hvaða liði heldur þú með í enska boltanum og hver er uppáhaldsleikmaðurinn þinn? Ég held með Liverpool og uppáhaldsleikmaðurinn minn er Sturridge.

En hver er uppáhaldsfótboltamaðurinn þinn í heiminum? Eiginlega bara Ronaldo hjá Real Madrid í spænsku deildinni.

Lestu bækur? Já. Fótboltabækurnar hans Gunnars Helgasonar eru í uppáhaldi. Ég er núna að lesa Rangstæður í Reykjavík en fékk Gula spjaldið í Gautaborg í jólagjöf og ætla að lesa hana næst.

Áttu systkini? Já, ég á tvö systkini. Ég er í miðjunni. Ég og stóra systir mín erum ekkert alltof góðir vinir af því hún er sex árum eldri en ég. Litli bróðir minn er svolítið skemmtilegur. Við erum alveg fínir vinir en hann er samt bara þriggja ára.

Ertu farinn að spá í hvað þig langar að verða þegar þú verður stór? Já, mig langar að reyna að verða atvinnumaður í fótbolta en annars verð ég kannski þjálfari í fótbolta.