Kunnuglegt, tímalaust þjóðlagapopp

Tónlistarmaðurinn Júníus Meyvant heldur tónleika á Húrra í kvöld ásamt hljómsveit sinni sem heldur í næstu viku á Eurosonic-hátíðina sem haldin er í Groningen í Hollandi.

Júníus Meyvant er listamannsnafn tón- og myndlistarmannsins Unnars Gísla Sigurmundssonar sem ættaður er frá Vestmannaeyjum. Nafnið tók hann upp eftir að hann fór að semja tónlist á þrítugsaldrinum eftir að hafa tekið munaðarlausan gítargarm á heimili foreldra sinna til sín.

Í upphafi sumars gaf hann út lagið Color Decay sem vakti talsverða athygli og fékk góðar viðtökur á öldum ljósvakans, en lagið var meðal annars mest spilaða lagið á Rás 2 árið 2014.

Tónlist Júníusar er lýst sem tilfinningaríku þjóðlagapoppi sem er í senn kunnuglegt og tímalaust.

Tónlistarmaðurinn Teitur Magnússon hitar upp en hann sendi frá sér sína fyrstu plötu, Tuttugu og sjö, í desember. Teitur er einnig liðsmaður hljómsveitarinnar Ojba Rasta.

Tónleikarnir verða sem áður segir á skemmtistaðnum Húrra í miðbæ Reykjavíkur. Húsið verður opnað klukkan 21 og tónleikarnir hefjast klukkan 22. Aðgangseyrir er 1.500 krónur.