Inflúensa og RS-sýking auka á vanda í verkfalli

Í síðustu viku greindust nokkrir Íslendingar með inflúensu og RS-sýkingu. Ólafur Baldursson, framkvæmdastjóri lækninga, segir aðgerðir lækna skella á spítalanum á versta tíma en í janúarmánuði herja jafnan skæðar pestir á landsmenn. „Það gerist nánast alltaf á þessum árstíma að það er enn meiri aðsókn að spítalanum en venjulega. Verkefnin okkar aukast á þessum tíma og það gefur augaleið að þegar um er að ræða verkfall lækna á sama tíma, þá fer þetta tvennt illa saman. Það eykur enn líkur á því að það verði erfitt fyrir okkur að tryggja öryggi sjúklinga. Það er barist við það á hverjum degi,“ segir Ólafur.

Á síðustu dögum hafa nokkrir einstaklingar greinst með inflúensu (bæði inflúensa A og B) og RS. Þessar veirusýkingar ganga alltaf hér á landi á þessum árstíma og má búast við að fleiri einstaklingar greinist með þessar sýkingar á næstu vikum.

Inflúensa getur verið skæður sjúkdómur, einkum hjá fólki með undirliggjandi sjúkdóma.

RS sýkir einkum börn á fyrstu aldursárum og getur valdið alvarlegum einkennum hjá yngstu börnunum.

Löng bið og þungt andrúmsloft

Á bráðamóttökunni í gær var biðin löng og ljóst að aðgerðir lækna tefja starfsemina þar allverulega. Ólafur segir bráðamóttökuna ekki mega við neinum truflunum á starfsemi sinni. „Allt árið um kring er starfsemin viðkvæm og má ekki við neinum truflunum,“ segir hann og óskar þess að deilan leysist skjótt því ástandið sé varasamt. „Við á Landspítalanum erum klemmd á milli deiluaðila og óskum eftir því að þeir leysi deiluna. Ástandið eins og það er núna er gríðarlega varasamt og þetta geta verið skæðar pestir sem ganga á þessum tíma.

Fréttablaðið greindi í gær frá sex konum sem biðu þess að fá að vita hvort þær komast í keisaraskurð. Fá þær að fara í aðgerðirnar? „Þær eru í mjög nákvæmu eftirliti og gætt vel að heilsu þeirra,“ segir Ólafur.

Andrúmsloft á spítalanum er þungt. „Maður hefur áhyggjur af starfsandanum við þessar aðstæður þegar samningar dragast og læknar fá á tilfinninguna að viðræður gangi hægt. Það togast á í læknum ýmsar tilfinningar því við höfum skrifað undir eiða sem við viljum ekki bregðast. Læknum finnst þetta óþægileg staða og óttast alvarlegar afleiðingar og mistök vegna verkfallsaðgerða í vikunni.“