Stefnir lífi sínu í hættu á morgun

Lífshættulegur gjörningur kanadíska listamannsins Deans Gunnarssonar mun fara fram bakvið Hörpu tónlistarhús klukkan 12 á morgun. Dean hyggst láta hlekkja sig við brennandi skip, reyna að losa sig og synda í land áður en hann verður eldinum að bráð.

Til stóð að framkvæma gjörninginn í gær við Sólfarið á Sæbraut en fresta varð áhættuatriðinu vegna veðurs. Viðburðurinn er hluti af sjónvarpsþættinum Escape or die! en í þættinum er fylgst með Dean þar sem hann ferðast um heiminn og reynir að bjarga sér úr lífshættulegum aðstæðum.

Veðurspá morgundagsins er góð og verður því reynt við atburðinn bakvið Hörpu, eða við Ingólfsgarð (gengið hægra megin við Hörpu). Kvikmyndatökuliðið mun hefjast handa klukkan 12 við að gera og græja og stefnt er að því að framkvæma atriðið um klukkan hálf 1.

Aðgangur er ókeypis og eru áhugasamir hvattir til að mæta.

Facebook-síðu hópsins má sjá hér.