„Ég er að fara á götuna“

„Ég er að fara á götuna,“ segir Marta Dröfn Björnsdóttir, einstæð móðir, sem horfir fram á að verða heimilislaus um mánaðarmótin. Fyrir fimm vikum fékk Marta Dröfn uppsögn á leigusamningi og leitaði í kjölfarið til Reykjavíkurborgar eftir félagslegu húsnæði.

Hún fékk þau svör að ekki yrði hægt að hjálpa henni fyrir mánaðarmót enda mikil aðsókn í húsnæðisúrræði Reykjavíkurborgar. 827 voru á biðlista eftir félagsíbúðum hjá Reykajvíkurborg 1. janúar síðastliðinn.

Marta  segist hafa fyrst sett sig í samband við Reykjavíkurborg í júlí síðastliðnum og óskaði þá eftir félagslegu húsnæði. Í millitíðinni fékk hún húsnæði á almennum leigumarkaði en er að missa þá íbúð um mánaðarmótin og hefur því leitað úrræða hjá Reykjavíkurborg. Svörin frá borginni eru hins vegar á þá lund að ekkert sé laust og hefur Mörtu verið bent á að hún geti leitað á gistiheimili fram til mánaðarmóta, sem er hægara sagt en gert að hennar sögn enda erfitt að fá inn rétt fyrir mánaðarmót. „Það er bara dótið í geymslu og gistiheimili.“

Líkt og fram kom áður er biðlistinn eftir félagsíbúð hjá Reykjavíkurborg ansi langur en Elfa Björk Ellertsdóttir, upplýsingafulltrúi velferðarsviðs Reykjavíkurborgar, segir Reykjavíkurborg benda einstaklingum í húsnæðisvanda á þær leiðir sem fyrir hendi eru í samfélaginu, frjálsan markað, leigufélög og sem tímabundið úrræði í neyð, gistiheimili.