Greinir á um ágæti tilboðs SA

Tilboð Samtaka atvinnulífsins (SA) í yfirstandandi kjaraviðræðum felur í sér 23,5 prósenta hækkun dagvinnulauna á þriggja ára samningstíma, að því er samtökin áréttuðu í tilkynningu í gær.

„Innifalið í þeirri hækkun er átta prósenta sérstök hækkun dagvinnulauna, samhliða auknum sveigjanleika vinnutíma og lækkun yfirvinnuálags,“ segir í tilkynningunni.

„Samkvæmt tilboði SA hækkaði lægsti taxti aðildarfélaga Starfsgreinasambandsins (SGS) um 47 þúsund krónur á mánuði á þremur árum. Meðaldagvinnulaun félagsmanna aðildarfélaga SGS hækkuðu úr 260 þúsund krónum á mánuði í 320 þúsund krónur eða um 60 þúsund krónur og meðaldagvinnulaun fiskvinnslufólks úr 290 þúsund krónum á mánuði í 360 þúsund eða um 70 þúsund krónur.“

Þá hafi SA einnig boðið sérstaka hækkun lágmarkstekjutryggingar fyrir fulla dagvinnu sem næði 280 þúsund krónum á mánuði í lok samningstímans.

Í samtali við fréttastofu sagði Björn Snæbjörnsson, formaður SGS, að hugmyndir SA feli í sér að lægsti kauptaxti hækkaði um 28 þúsund krónur á næstu þremur árum.

„Að öðru leyti áttu menn að fá einhver átta prósent með því að lengja dagvinnubilið frá sex á morgnana til sjö á kvöldin og yfirvinnuálagið færi úr 80 prósentum (á dagvinnulaunin) í 50 prósent,“ sagði hann og kvað tilboðið rýrt.

„Við værum kannski tilbúin að skoða hlutina ef þetta væri til eins árs.“

Sigurður Bessason, formaður Eflingar og talsmaður Flóabandalagsins, tók í svipaðan streng.

Raunin væri að félögin væru sjálf að leggja til launahækkunina með breytingum á yfirvinnutíma og vaktavinnuálagi.

„Þannig að ég gat ekki og hef ekki séð það sem lausn í þeirri deilu sem hér er undir,“ sagði hann.