Núverandi staða stefni velferð dýra í voða

Umhverfis- og framkvæmdanefnd Fljótsdalshéraðs vill að bæjarstjórn sveitarfélagsins, Matvælastofnun (MAST) og ráðherra landbúnaðarmála komi í veg fyrir að það endurtaki sig að stór hluti Austurlands verði dýralæknislaus.

„Dýralæknirinn á svæðinu fór í þriggja vikna frí í desember og á meðan var hér aðeins dýralæknir á bakvakt frá Vopnafirði,“ segir Árni Kristinsson, formaður umhverfis- og framkvæmdanefndar. Svæðið sem um ræðir er Fljótsdalshérað og hreppur, Borgarfjarðarhreppur, Seyðisfjarðarkaupstaður og hluti Fjarðabyggðar.

„Áður voru hér tveir héraðsdýralæknar í fullu starfi en með tilkomu MAST er héraðsdýralæknirinn í raun aðeins skrifstofulæknir sem sinnir ekki skepnum,“ segir Árni.

Eftir standi að maður í hálfu starfi sinni gífurlegu landsvæði. Árni veltir því fyrir sér hvort það fyrirkomulag brjóti í bága við lög um velferð dýra.

Í tilkynningu á heimasíðu MAST segir að í þrígang hafi verið auglýst eftir dýralæknum til að þjónusta svæðið en án árangurs. Lagt hefur verið til að reglugerð verði breytt á þann veg að hægt verði að bjóða upp á hundrað prósent stöðu í stað fimmtíu prósent stöðu eins og staðan er nú.

„Ég held að ríkið verði að koma að þessu með aukið fjármagn. Einkareksturinn hefur ekki skilað nægu hingað til,“ segir Árni.