Ísland í dag: Guðjón Valur, Kolbeinn og Sara Björk í hljómsveit Eyfa

Eyjólfur Kristjánsson mætti á dögunum í hljóðver með stórri og hæfileikaríkri hljómsveit til að taka upp nýtt myndband við lagið Ég lifi í draumi. Hljómsveitarmeðlimirnir eru þó þekktari fyrir annað en tónlistarhæfileika.

Lagið hefur fylgt Eyjólfi í nær þrjátíu ár en Björgvin Halldórsson söng það í Söngvakeppni Sjónvarpsins árið 1986. Að þessu sinni flutti Eyfi lagið sjálfur, Aðalsteinn Ásberg Sigurðsson samdi nýjan texta og margar þekktustu íþróttastjörnur þjóðarinnar skipa hljómsveitina.

Kolbeinn Sigþórsson sést sýna lipra takta með rafmagnsgítarinn, Sara Björk Gunnarsdóttir leikur á hljómborð, landsliðsfyrirliðinn Guðjón Valur Sigurðsson syngur bakraddir og svo mætti lengi telja.

Hugmyndin að gerð myndbandsins kviknaði í kjölfar nýjustu auglýsingaherferðar Lottó um stuðningsmanninn Leif Ottó sem mætir reglulega á íþróttakappleiki til að styðja sitt fólk. Landsliðsþjálfararnir Lars Lagerbäck og Heimir Hallgrímsson eru í hlutverki upptökustjóra í myndbandinu og gefa Eyfa góð ráð meðan á upptöku stendur.

Í Íslandi í dag í kvöld var myndbandið sýnt og rætt við aðstandendur þess.