Kona klemmdist milli bíla

Óvenju mörg umferðaróhöpp urðu í umdæmi lögreglunnar á Suðurnesjum í vikunni. Í Grindavík slapp kona betur en á horfðist þegar hún klemmdist milli tveggja bifreiða.

Í lýsingu frá lögreglunni á Suðurnesjunum kemur fram að konan hafi verið að stíga út úr bifreið sinni þegar hann ökumaður bakkaði á hana þannig að hún varð á milli.

Konan var flutt á Heilbrigðisstofnun Suðurnesja og reyndist hún ekki alvarlega slösuð.

Þá hafnaði lítil rúta með átta farþega innan borðs hálf utan vegar á Garðvegi þegar bílstjórinn missti stjórn á henni.

Einn ökumaður ók á vegrið á Reykjanesbraut og annar ók á ljósastaur í Keflavík. Þrír árekstrar urðu í umdæminu en ekki urðu alvarleg slys á fólki vegna þessara óhappa.