Bjarga kveðjum bandarískra flugmanna: „Þetta hefur mikla þýðingu fyrir þá“

„Þetta hefur mikla þýðingu fyrir þá,“ segir Sigurður Björgvin Magnússon sem hefur undanfarið bjargað minjum úr gömlu flugskýli á fyrrverandi varnarsvæði Atlantshafsbandalagsins við Keflavíkurflugvöll á Miðnesheiði.

Sigurður Björgvin er til að mynda núna að pakka inn flísum sem liðsmenn þyrlubjörgunarsveitar Bandaríkjahers rituðu skilaboð á meðan dvöl þeirra stóð á Íslandi. Sigurður birti meðal annars myndir af þessum flísum í Facebook-hópnum NASKEF en meðlimir hans telja um þrjú þúsund manns sem störfuðu á einhverjum tímapunkti á varnarsvæðinu á Miðnesheiði.

Sigurður hefur fengið fjölda skilaboða frá ekkjum þeirra sem skildu eftir sig skilaboð á flísunum í flugskýlinu og þá hefur þyrlubjörgunarsveitin sem var hér á landi á vegum Bandaríkjahers, en er nú með aðsetur í Lakenheath á Bretlandi, einnig óskað eftir góðum myndum af vegg í flugskýlinu sem sýnir allar aðgerðir sem sveitin tók þátt í á Íslandi á árunum 1971 til 2005.

Til stendur að endurgera þennan vegg í Lakenheath en þangað sendir Sigurður flísarnar og verður þeim komið þaðan til ættingja þeirra sem skildu eftir sig skilaboð í flugskýlinu.

„„Þegar ég kom hingað átti ég tvær dætur. Nú á ég þrjár. Það gerist þegar það er sex stiga frost,“ skrifaði liðþjálfinn Kirsch á eina flísina en hann var á varnarsvæðinu frá febrúar 2002 til júlí 2004.

„1.115 dagar og aðeins einu sinni tekinn fyrir ölvunarakstur,“ skrifaði liðþjálfinn JimmyFord sem var á varnarsvæðinu frá apríl 2001 til apríl 2004.

Þá var einn sem lauk veru sinni í Bandaríkjaher á Íslandi. „Takk fyrir frábæran endi á flugferli mínum,“ skrifar JimHamblin sem var einnig þekktur undir nafninu „Jöklamaðurinn“.