Kvarta undan vali verjenda og slælegum vinnubrögðum

Afstaða félag fanga og annarra áhugamanna um bætt fangelsismál og betrun, hafa sent Lögmannafélagi Íslands bréf vegna vals verjenda og slælegra vinnubragða, eins og það er orðað í bréfinu. Þá sé sakborningum útvegaður lögmaður sem sé ekki á svokölluðum bakvaktarlista Lögmannafélagsins. Að lögreglumenn hafi jafnvel beint samban við tiltekna lögmenn og að „örfáir útvaldir“ lögmenn fái meirihluta allra sakamála.

Félagið óskar þess að Lögmannafélagið móti nýjar verklagsreglur um tilnefningu verjanda á þann veg að réttaröryggi verði tryggt og jafnræði ríki. Þar að auki verði stuðlað betur að því að lögmenn sem taki að sér sakamál hafi bæði reynslu og þekkingu til að tryggja hag sakbornings.

Þar að auki kæmi til greina að fram færi stjórnsýsluúttekt á málinu. Því sendi Afstaða afrit af bréfinu til ýmissa lögregluembætta og yfirstjórnar lögreglumála og ákæruvalds. Dugi önnur úrræði áskilur félagiöð sér rétt til þess að beina málinu til umboðsmanns Alþingis.

Hafa reglulega fengið kvartanir

Í bréfinu, sem Guðmundur Ingi Þóroddsson, formaður Afstöðu, skrifar undir, segir að félaginu hafi reglulega fengið kvartanir í rúman áratug vegna slæmra vinnubragða tiltekinna lögmanna. Þær lúta að því að fangar eigi erfitt með að ná í lögmenn sína og þeir séu illa undirbúnir fyrir dómsmál.

„Þá er einnig kvartað yfir því að lögmenn gleymi viðamiklum hlutum í tengslum við mál eða hafi ekki nægjanlega reynslu.“

Þar að auki segir í bréfi Afstöðu að jafnvel hafi borist einstaka kvartanir þar sem fullyrt er að verjandi sé undir áhrifum vímuefna, bæði í dómssal og á lögmannastofu.

„Taka ber fram að reyndir og vel metnir verjendur virðast engin mál fá frá lögreglu eða í það minnsta sárafá.“

Afstaða telur það gríðarlegt hagsmuna- og réttindamál fyrir fanga að eiga auðvelt með að ná í lögmann sinn og að hann sé vel upplýstur um framgang máls þeirra.

„Með því að ganga fram hjá vel skipulögðu og fyrirfram ákveðnu valferli hins óháða lögmannasamfélags er ekki aðeins stefnt í voða lögvörðu valfrelsi borgara á lögmanni heldur beinlínis vegið að stjórnarskrárvörðum réttindum sakbornings er lúta að frjálsu vali sakaði manns á verjanda úr hópi sjálfstæðra lögmanna sem algerlega eru óháðir handhöfum lögregluvalds.“