Eigandi hundsins Rjóma áfrýjar

Hilmar Egill Jónsson, eigandi hundsins Rjóma, ætlar ekki að una niðurstöðu dóms sem féll í héraði þess efnis að honum sé óheimilt að flytja til landsins hund sinn sem er að tegundinni English Bull Terrier. Vísir hefur fjallað ítarlega um málið.

Hilmar Egill ritar harðort bréf þar sem hann sakar Matvælastofnun um valdníðslu, að lögmaður stofnunarinnar hafi ekki fært nein rök fyrir máli sínu en þrátt fyrir það hafi dómur í héraði fallið á þá leið að honum er meinað að flytja hund sinn Rjóma til landsins.

„Mín ósk er að stofnunin verði látin svara fyrir sig í Hæstarétti, og því hef ég ákveðið að áfrýja niðurstöðu héraðsdóms þangað,“ segir Hilmar Egill og bætir því við að það geti vart „talist eðlilegt að lítil fjölskylda þurfi að berjast gegn geðþóttaákvörðun ríkisstofnunar, með miklum kostnaði. Það á ekki að vera mitt hlutverk að færa rök fyrir því að fjölskylduhundurinn sé öruggur, heldur auðvitað ríkisstofnunarinnar að færa haldbær rök fyrir því af hverju hann er ekki velkominn til Íslands.“

Matvælastofnun vísar til þess að reglur kveði á um að þessi tiltekna tegund megi ekki þrífast á Íslandi. Hún hefur verið talin árásargjörn en þetta segir Hilmar Egill hina mestu firru; þarna sé verið að rugla saman tegundunum English Bull Terrier og Pitt Bull Terrier, sem séu ólíkar tegundir. Reglurnar segir hann ekki styðjast við nein gögn, en sjálfur hefur hann lagst í ítarlegar rannsóknir sem sýna að English Bull Terrier-hundar séu síður en svo árásargjarnari en aðrar hundategundir. Hilmar Egill segist hafa lagt þau gögn fram en allt komi fyrir ekki. Einu gögnin sem hins vegar lögmaður Matvælastofnunar leggur fram er grein frá árinu 2000, af vef CNN, þar sem keur fram að English Bull Terrier-hundur hafi bitið einstakling.

Eins og áður sagði hefur Vísir fjallað ítarlega um málið og hér má sjá umfjöllun um þessa hundategund.