Di Maria of dýr fyrir FC Bayern, segir Lahm

Philipp Lahm, leikmaður FC Bayern í Þýskalandi, telur að Angel Di Maria, leikmaður Manchester United, sé of dýr fyrir félagið en orðrómur hefur verið uppi um að Di Maria sé óánægður í Manchester-borg og vilji yfirgefa United.

Di Maria er dýrasti leikmaður í sögu ensku úrvalsdeildarinnar en Manchester United eyddi 59,7 milljónum punda, 12,3 milljörðum króna, í hann fyrir ári síðan. Di Maria komst ekki í lið United undir lok síðustu leiktíðar og mátti verma bekkinn meira en búist var við í upphafi tímabils.

"Hann kostar hellings pening. Það eru fleiri hlutir sem spila inn í, t.d. laun og allt það. En það eru aðilar innan okkar félags sem vita meira um þetta mál en ég," segir Lahm.