Neymar heldur fram sakleysi

Brasilíumaðurinn Neymar heldur því enn fram að hann hafi ekkert rangt gert og átti ekki skilið að verða dæmdur í fjögurra leikja bann.

Neymar fékk að líta rauða spjaldið í 1-0 tapi Brasilíu gegn Kólumbíu í Suður-Ameríkukeppninni í síðustu viku fyrir að reyna að skalla Jeison Murillo og veitast að dómara leiksins, Enrique Osses, með fúkyrðaflaum.

Hann var í fyrstu dæmdur í eins leiks bann en á föstudag ákvað knattspyrnusamband Suður-Ameríku að úrskurða hann í fjögurra leikja bann. Neymar ákvað þá að yfirgefa herbúðir brasilíska landsliðsins og halda heim á leið.

Neymar hefur nú tjáð sig um málið í viðtölum við fjölmiðla í Brasilíu og heldur hann fram sakleysi sínu.

„Það gerðist ekkert á leið aftur til búningsklefanna, í raun. Ég beið þar eftir dómaranum til að spyrja hann um ástæður þess að hann rak mig út af,“ sagði Neymar.

„Þá hópaðist fólk saman og öryggisverðir komu að mér því þeir héldu að ég vildi ráðast á dómarann,“ bætti hann við.

Neymar sagði að hann hafi ákveðið að fara frá Síle eftir að hafa ráðfært sig við föður sinn og forráðamenn brasilíska landsliðsins.

„Það er líf í landsliðinu eftir Neymar. Leikmennirnir hafa sýnt að þeir geta unnið leiki og unnið Suður-Ameríkukeppnina,“ sagði hann.