Svartsvanir í tilhugalífinu: Vangaveltur um hvort grípa þurfi til aðgerða

Vangaveltur eru uppi um hvort grípa þurfi til aðgerða vegna svarta svanaparsins sem heldur nú til á Suðurlandi. Verpi parið hér yrði það í fyrsta sinn sem svartir svanir fjölga sér á Íslandi.

Svartir svanir hafa verið árlegir gestir hér á landi síðustu ár en það er þó sjaldgæfara að þeir flækist hingað í pörum. Tegundin er upprunin í Ástralíu en er síðan flutt af mannavöldum í andagarða í Norðvestur-Evrópu.

Ekki eðlilegir í Evrópu

Gunnar Þór Hallgrímsson, dósent í dýrafræði, segir svanina ekki eðlilega í náttúrunni hér. Þeir séu ekki skilgreindir sem náttúruleg villt tegund og því sé spurning um hvort koma þurfi í veg fyrir að þeir fjölgi sér. Það sé þó ákvörðun sem stjórnvöld þurfi að taka.

„Mér finnst langlíklegast með þessa svani, og vona það reyndar, að þeir fái að vera í friði en að þeir verpi ekki. Það væri langsamlega best. Þá höfum við aðeins svigrúm til að nota umræðuna til að velta fyrir okkur hvað þarf að gera til framtíðar,“ segir Gunnar í samtali við Vísi. 

Ekki alslæmt ef þeir fjölga sér

Hann segist efast um ágæti þess að innfluttar tegundir nái sér á strik í villtum vistkerfum. Það sé þó ekki hundrað í hættunni þó það reyni fyrir sér. „Það er líka margt sem við vitum ekki. Við vitum ekki hvort svarti svanurinn muni keppa við einhverja íslenska fugla um fæðu eða búsvæði en það þarf að grípa til aðgerða ef tegundin verður ágeng.“

Aðspurður hvort svarti svanurinn gæti komið til með að menga hvíta svanastofninn segist hann ekki vita til þess að tegundirnar nokkurn tímann hafi kynblandast.

„Áhættan er fyrst og fremst sú að innfluttu tegundirnar lendi í samkeppni við einhverjar innlendar tegundir þannig að þær verði ágengar og geti skaðað innlendar náttúrulegar tegundir.“