Hjörvar: Ef Sterling er besti unglingur heims þarf að borga honum eftir því

Raheem Sterling gerði allt vitlaust í síðustu viku þegar hann hafnaði launatilboði Liverpool upp á 100.000 pund á viku og ræddi svo málefni sín í viðtali við BBC.

Sterling er sagður vilja fá hærra kaup eigi hann að vera áfram hjá Liverpool, en leikmaðurinn ungi er þó með samning til ársins 2017.

„Við höfum oft talað um Sterling sem besta ungling í heimi og þá velti ég því fyrir mér hvort ekki þurfi að borga honum eins og besta unglingi í heimi. Það hlýtur að vera,“ sagði Hjörvar Hafliðason í Messunni í gær.

„Þetta er hluti af þessum geðsjúka sjónvarpssamningi sem kemur í gildi á þar næstu leiktíð. Þá aukast sjónvarpstekjurnar og menn vilja bara meira.“

„Það er ekkert hægt að ganga að neinu vísu með þennan strák því hann er ekkert frá Liverpool. Þetta er strákur frá London sem er sóttur frá QPR þannig það er frekar langsótt að ætlast til þess að hann haldi tryggð við liðið,“ sagði Hjörvar.

Alla umræðuna má sjá í spilaranum hér að ofan.