Margrét Maack gerir Gettu Betur upp: „Tókst betur en við þorðum að vona“

„Við héldum að þetta yrði miklu meiri bylting en raunin varð,“ segir Margrét Erla Maack, annar dómara og spurningahöfunda í Gettu Betur. Síðasta keppni vetrarins fór fram í gær en þá lagði Menntaskólinn í Reykjavík Fjölbrautarskólann í Garðabæ með 41 stigi gegn átján í úrslitaþættinum.

Árið í ár var í fyrsta skipti sem skólar þurftu að hafa sem jafnast kynjahlutfall keppenda. Aldrei hafa fleiri stelpur keppt en einmitt í ár. Steinþór Helgi Arnsteinsson, meðdómari Margrétar, deildi fyrir keppnina í gær mynd af því þegar hann sigraði Gettu Betur fyrir áratug fyrir Borgarholtsskóla og sagði að nú loksins hefðu skilaboð hans náð alla leið. 

Mórallinn og stemningin miklu betri

Þá klæddist hann bol sem á stóð „Gettu Betur er ekki karlasport, fleiri stelpur í Gettu betur.“ Þriðja hjól þáttarins, maðurinn bak við tjöldin, Björn Teitsson, sendi síðan frá sér pistil sem birtist á Kjarnanum skömmu fyrir keppnina þar sem hann fagnaði þeim árangri sem náðst hafði.

„Það kom síðan á daginn að keppninn breyttist ekkert mikið. Það komu eingöngu inn nýjar raddir og öðruvísi þekking. Mórallinn og stemningin bakvið tjöldin varð líka talsvert öðruvísi og betri með breytingunni. Það var svo ótrúlega skrítið að Gettu Betur var yfirleitt eini þátturinn með menntaskólakrökkum fyrir menntaskólakrakka og það voru nánast aðeins strákar að keppa.“

Þegar breytingarnar voru ákveðnar voru margir sem sendu frá sér pistla og skeyti og lýstu yfir annað hvort yfir stuðningi eða vanþóknun á þeim. Þar má nefna Stefán Pálsson, Evu Hauksdóttur og málfundafélag Verzlunarskóla Íslands en Verzló var eini skólinn sem studdi ekki breytinguna. 

Við höfum áhuga á jafnrétti

„Við gerðum þetta bæði í fyrra og núna að spyrja meira um konur og hluti sem tengjast jafnrétti,“ segir Margrét en í keppninni í gær var til að mynda spurt um kvennafrídaginn, fæðingarorlof og skopast með að karlmenn sem eiga börn geti náð langt í íþróttum.

„Spurningarnar í gegnum tíðina hafa oftar en ekki litast af áhugasviðum dómaranna og við höfum áhuga á jafnrétti. Við vildum gera konum hærra undir höfði og það eru oftar en ekki líka erfiðari spurningar því það hefur verið fjallað svo mikið minna um þær í gegnum tíðina.“

Margrét segir að viðbrögð flestra séu mjög jákvæð. „Það hafa margir komið til mín og hrósað mér fyrir hve mikið það er spurt um konur. Sannleikurinn er samt eiginlega sá að Björn og Steinþór semja flestar þær spurningar. Það er samt alltaf einn og einn sem er ósáttur en að er hvort eð er fólk sem maður myndi ekkert bjóða í afmælið sitt.“

Aðspurð segir Margrét að það gæti verið áhugi fyrir því af hálfu hennar og Steinþórs að vera með þáttinn áfram að ári. „Þú verður að spyrja mig að þessu síðar. Ég ætla aðeins að meta stöðuna en það er svo í heimi fjölmiðla og dagskrárgerðar að það gætu komið til önnur verkefni sem hjálpa manni betur að borga leiguna. Við verðum bara að sjá til en áhuginn gæti verið fyrir hendi.“