Í tveggja mánaða fangelsi fyrir umfangsmikil greiðslukortasvik

Erlendur karlmaður afplánar nú sextíu daga fangelsisvist hér á landi vegna aðildar sinnar að umfangsmiklum greiðslukortasvikum og skilríkjafölsun. Þetta kemur fram í tilkynningu frá lögreglunni á Suðurnesjunum.

Maðurinn kom til landsins frá Amsterdam um síðustu mánaðarmót. Lögreglan á Suðurnesjum hafði þá afskipti af honum og í ljós kom að greiðslukort sem hann hafði meðferðis var ekki hans eign en hann kvaðst hafa fundið það. Maðurinn var í framhaldinu handtekinn og heimilaði hann leit í tölvu sinni og tveimur farsímum.

Þar fundu lögreglumenn mikið magn gagna varðandi umfangsmikil greiðslukortasvik og skilríkjafölsun, meðal annars skjal með öllum upplýsingum um 138 greiðslukort í tölvusamskiptum milli hans og annarra.

Maðurinn viðurkenndi svo að hafa greitt fyrir ferðalag sitt með greiðslukortaupplýsingum sem hann fengið af tiltekinni síðu á internetinu, sem hafði að geyma upplýsingar um kortin 138. Auk þessa ferðaðist maðurinn á fölsuðu vegabréfi.