Nemendur stofna samtök um samfélagsábyrgð

Í gær voru samtökin Samfélagsábyrgð og sjálfbærni stofnuð í Háskólanum í Reykjavík. Það eru nemendur háskólans sem standa að samtökunum. Þetta kemur fram í tilkynningu forsvarsmönnum samtakanna.

„Samfélagsábyrgð felst í því að axla ábyrgð á áhrifum sem maður hefur á annað fólk og umhverfi okkar. Eins og nafnið gefur til kynna þá ætla samtökin að beita sér fyrir því að efla vitund meðal nemenda HR varðandi málefni sem tengjast samfélagsábyrgð og sjálfbærni. Við viljum tengja þessa þætti inn í námið og skólann sjálfan, þannig að nemendur komi til með að beita þeirri þekkingu til framtíðar,“ segir Daníel Agnarsson, nemi í tölvunarfræði með viðskiptafræðivali og formaður nýstofnaðra samtaka.

„Við erum nú þegar komin með grófa dagskrá um það sem við höfðum hugsað okkur að gera á næstunni. Til dæmis ætlum við að hafa kvikmyndasýningu, halda málfund og fara í fyrirtækjaheimsókn. Einnig viljum við fara í samstarf við Háskóla Íslands vegna Grænu daganna og Hjólað í skólann. Við kusum í stjórn í dag þannig þetta er allt svona í startholunum ennþá og það er mikið af spennandi hlutum sem hægt er að skipuleggja.“

Daníel og aðrir nemendur sem koma að stofnun samtakanna munu kynna þau á bás Stúdentafélags HR á Háskóladaginn í HR þann 28. febrúar.