Reyna ekki mokstur í bráð

Súðavíkurhlíð og Kirkjubólshlíð var lokað klukkan tíu í gærkvöldi vegna snjóflóðahættu og verður ekki reynt að moka þær í bráð. Hávaða rok er nú á Vestfjörðum og klukkan þrjú í nótt fór að snjóa og snjóar enn.

Allir fjallvegir eru að líkindum lokaðir og ekki verður reynt að ryðja fyrr en veður lægir og búið verður að meta snjóflóðahættu.

Skólaakstur í Ísafjarðarbæ fellur niður í dag og sömu sögu er að segja af strætisvagnaferðum á svæðinu.

Hátt í 20 hús voru rýmd á Patreksfirði í gær vegna snjóflóðahættu og þar féll eitt flóð án þess að valda tjóni og í gærkvöldi voru nokkur hús rýmd á Tálknafirði af sömu sökum.

Ekki er vitað hvort einhver flóð hafa fallið í nótt, enda ekkert skyggni í snjókófinu og það er spáð vitlausu veðri vestra fram eftir degi. Snjóflóðadeild Veðurstofunnar er að funda um ástandið vestra þessa stundina og Almannavarnir fylgjast grannt með framvindu mála.