Viðskiptaráð styður gjaldtöku á ferðamannastöðum

Viðskiptaráð Íslands hefur skilað inn umsögn til atvinnuveganefndar Alþingis vegna frumvarps til laga um náttúrupassa. Ráðið fagnar því að stjórnvöld láti þetta mál sig varða og leggur til að frumvarpið nái fram að ganga að teknu tilliti til athugasemda ráðsins.

Þetta kemur fram í tilkynningu frá Viðskiptaráði. Umsögn ráðsins í heild sinni má sjá hér.

Ráðið segir að gjaldtaka á ferðamannastöðum sé besta leiðin til tekjuöflunar vegna uppbyggingar ferðamannastaða og segir aðrar valkosti sem nefndir hafa verið, eins og komugjald og gistináttagjald vera gallaðar.

Þó segir Viðskiptaráð þeir staðir sem henti vel til sértækrar gjaldtöku ættu að hafa lagaheimild til þess. Aðrir staðir ættu að falla undir náttúrupassa.

„Slík útfærsla dregur úr átroðningi á vinsælustu ferðamannastöðunum ólíkt einum náttúrupassa fyrir alla áfangastaði. Þá skapar hún sterkari forsendur til nýsköpunar og uppbyggingar nýrra áfangastaða.“

Þá segir ráðið að gjaldtaka fari í gegnum sjálfseignarstofnun fremur en í gegnum ríkissjóð. Það komi í veg fyrir að gjaldið verði að skattstofni þegar krafan um innviðauppbygginu dvíni. Ráðið telur að þá beri að afnema gistináttaskatt samhliða upptöku náttúrupassa.

Viðskiptaráð segir stærstu áskorun ferðaþjónustunnar vera að auka verðmætasköpun á hvern ferðamann.

„Gjaldtaka á ferðamannastöðum er lykilskref í átt að því markmiði. Auk þess þarf að endurskoða umgjörð auðlindastjórnunar og bæta rekstrarumhverfi greinarinnar.“

„Fyrirliggjandi frumvarp er betra en óbreytt ástand. Brýnt er að gera breytingar á núverandi fyrirkomulagi sem fyrst til að náttúruperlur landsins liggi ekki áfram undir skemmdum. Viðskiptaráð leggur því til að frumvarpið nái fram að ganga að teknu tilliti til athugasemda ráðsins.“