Vilja sambærilegar hækkanir og læknar

Hjúkrunarfræðingar líta til lækna í komandi kjaraviðræðum, segir Ólafur G. Skúlason, formaður Félags hjúkrunarfræðinga sem nú móta kröfugerð sína. Hjúkrunarfræðingar stefna í að minnsta kosti tuttugu prósenta launahækkunarkröfu miðað við orð formannsins. 

Grunnlaunakrafan fremst

„Það er ekkert leyndarmál að laun hjúkrunarfræðinga eru ekki samkeppnishæf miðað við aðrar háskólastéttir. Okkar meginkrafa er sú að laun okkar verði leiðrétt til jafns á við þær. Það er aðallega grunnlaunakrafan sem verður sett fram", sagði Ólafur í fréttum Stöðvar 2 í kvöld.

Forysta félags hjúkrunarfræðinga er nú á ferð um landið til fundar við félagsmenn í ólíkum sveitarfélögunum vegna komandi kjaraviðræðna og eru næstu fundir á Norðfirði og Egilsstöðum. Yfir 3700 manns eru í félaginu og árið 2013 þáðu tæplega þrjú þúsund hjúkrunarfræðinga laun samkvæmt kjarasamningum. 

Horfa til lækna 

Hjúkrunarfræðingar móta kröfur sínar til fulls þessa dagana í húsi sáttasemjara og ekki enn víst hvort farið verði fram á krónutöluhækkun launa eða prósentutölu, né hvort samið verði til lengri tíma nú eða meira en til eins árs. Öruggt er þó að hjúkrunarfræðingar munu taka mið að því sem læknar sömdu um í fyrri mánuði, launahækkunumnum upp á að minnsta kosti 20 prósent.  „Allur vinnumarkaðurinn horfir auðvitað þangað", sagði Ólafur um samningar lækna við ríkið. „Við erum hluti af þessum opinbera geira sem er um tólf prósent af vinnumarkaðnum þannig að við teljum að við eigum að fá svipaðar launaleiðréttingar og læknarnir. Það eru sömu rök sem gilda um okkar stétt og þeirra. Við horfum vissulega til þeirra". 

Meiri menntun en lægri laun

Helstu baráttumál hjúkrunarfræðinga undanfarinn áratug eða svo er að fá dagvinnulaun hækkuð og vinnutíma styttan, sér í lagi hjá vaktavinnufólki. Hjá félaginu er til dæmis bent á mikinn mismun á launakjörum háskólamenntaðra ríkisstarfsmanna. Starfsmenn stjórnarráðsins, líkt og til dæmis tæknifræðingar og viðskiptafræðingar fái um fimmtungi hærri laun en hjúkrunarfræðingar sem þó hafa almennt lengri menntun að baki.  „Við miðum okkur við aðrar háskólamenntaðar stéttir. Til dæmis sjáum við að stéttir sem hafa minni menntun en við, talið í árafjölda og einingafjölda, eru kannski með tuttugu til tuttugu og fimm prósent hærri laun en hjúkrunarfræðingar sem er ekki sanngjarnt. Við teljum okkar þekkingu jafn verðmæta", sagði Ólafur.