Afbrigðileg kúariða í Noregi

Nýlega greindist kýr í Noregi með afbrigðilega gerð kúariðu. Þessi gerð er afar sjaldgæf en er ekki talin smitandi, hvorki milli dýra né manna. Þetta kemur fram í tilkynningu frá Matvælastofnun.

Afbrigðileg gerð kúariðu hefur greinst í mörgum löndum, meðal annars eitt tilfelli í Svíþjóð árið 2006 og nú í Noregi. Þessi gerð er þó mjög sjaldgæf, aðeins um eitt tilfelli greinist í hverri milljón sýna. Talið er að þessi gerð kúariðu sé vegna breytinga sem gerast af sjálfu sér á próteinum í heilanum í gömlum gripum. Kýrin sem um ræðir í Noregi var fimmtán ára, sem er nokkuð hár aldur. Í Evrópu og víða annars staðar í heiminum eru umfangsmiklar reglubundnar sýnatökur í sláturhúsum vegna kúariðu. Tilfellið í Noregi fannst við rannsókn á sýnum sem tekin voru samkvæmt lögbundinni eftirlitsáætlun.

Ísland er í hópi landa sem Alþjóða dýraheilbrigðisstofnunin hefur viðurkennt sem kúariðulaust land. Viðurkenningin var veitt eftir umfangsmikið mat á líkum á að kúariðan sé til staðar í landinu. Í tilkynningunni frá MAST segir að matið byggi á ýmsum sögulegum gögnum og niðurstöðum úr eftirliti. Það sem vegi þyngst í mati á Íslandi hvað þetta varðar séu þær ströngu reglur sem gildi um innflutning, meðal annars að innflutningur á lifandi nautgripum sé óheimill og að ávallt hafi verið bannað að nota kjöt og beinamjöl sem fóður fyrir nautgripi.

„Liður í því er að bændur tilkynni dýralæknum um nautgripi með einkenni frá taugakerfinu, t.d. óstöðugleika, krampa eða lömun, og jafnframt um gripi sem drepast eða þarf að lóga vegna slysfara eða veikinda af ókunnum ástæðum. Nauðsynlegt er fyrir Ísland að geta lagt fram niðurstöður rannsókna á sýnum úr slíkum gripum við endurmat OIE á stöðu landsins hvað kúariðu varðar,“ segir orðrétt í tilkynningunni.