Víða opið á skíðasvæðum í dag

Landsmenn geta komist á skíði á flestum skíðasvæðum á landinu í dag.

Opið verður í Skálafelli og Bláfjöllum í dag milli 10 og 17. Í Bláfjöllum er 5-7 metra vindur, bjart og 9 gráðu frost. „Frostið bítur í svo gott er að klæða sig vel. Færið er troðinn pakkaður snjór og færið því gott. Göngubraut verður lögð uppúr klukkan 10,“ segir í tilkynningu.

Hlíðarfjall

Opið verður í Hlíðarfjalli á milli klukkan 10 og 16 um helgina. „Veðurspá er okkur hagstæð og vonum við bara að hún haldi. „Núna rétt rúmlega 8 eru -7°C og 5 m/sek. Það hefur bæði snjóað hjá okkur og svo hefur einnig verið framleiðsla í gangi þannig að það flennifæri.“ Í tilkynningu segir að það  fimm skíðalyftur verði opnar og fimmtán skíðaleiðir. „Svo er skíðaskólinn fyrir börnin bæði á laugardag og sunnudag.“

Ísafjörður

Opið er á skíðasvæði Ísafjarðarbæjar í dag. Í Tungudal verður opið milli klukkan 10 og 16, en í Seljalandsdal frá klukkan 11. Í tilkynningu segir að troðnar verði eins mikið af göngubrautum og tími leyfir. „Veður um þessar mundir er vestan 3 m/s og -5° og stefnir í frábæran dag.“

Siglufjörður

„Skíðasvæðið á Sigló skartar sínu fegursta í dag, púðursnjór um allt og brekkur eins og silki. Opið í dag og á morgun frá kl. 11-16.“ Fjórar lyftur verða opnar og tíu brekkur, auk þess að sérstök ævintýraleið verður fyrir þá yngstu.

Stafdalur

Opið verður á skíðasvæðinu í Stafdal frá klukkan 11 til 16. „Dagurinn lítur vel út það er hæglætis veður á svæðinu og fínt færi.“

Dalvík

Opið verður í báðum lyftum alla helgina frá klukkan 11 til 16. „Veðrið frábært til útivistar, logn og -5°. Færið er eins og best verður, nýtroðinn snjór og mikið af honum. Göngubrautin er klár fyrir helgina.“

Oddsskarð

Opið frá klukkan 11 til 15. Suðvestan 5 metrar á sekúndur, 9 gráðu frost og léttskýjað. „Troðinn þurr snjór. Gilið, S-æfingabakki, Sólskinsbrekka og „Jib-park“,“ segir í tilkynningu.