EFTA-dómstóllinn: Fimm dómar kveðnir upp gegn Íslandi

EFTA dómstóllinn kvað í morgun upp fimm dóma gegn Íslandi í samningsbrotamálum vegna brota á EES samningnum. Íslenska ríkið þarf að greiða málskostnað í öllum málunum.

Dómar féllu vegna brota varðandi innleiðingu á eftirfarandi gerðum:

• Tilskipun 2009/125/EB um ramma til að setja fram kröfur varðandi visthönnun að því er varðar orkutengdar vörur
• Tilskipun 2011/7 um greiðsludrátt í verslunarviðskiptum
• Tilskipun 2004/113/EB um beitingu meginreglunnar um jafna meðferð karla og kvenna að því er varðar aðgang að og afhendingu á vörum og þjónustu.
• Tilskipun Evrópuþingsins og ráðsins 2009/48/EB, frá 18. júní 2009, um öryggi leikfanga
• Reglugerð Evrópuþingsins og ráðsins (ESB) nr. 1007/2011 frá 27. september 2011 um heiti textíltrefja og viðkomandi merkimiða og merkingar varðandi trefjasamsetningu textílvara

Málin voru höfðuð af Eftirlitsstofnun EFTA (ESA) og er það síðasta stigið í meðferð samningsbrotamáls gagnvart EFTA ríki. Ríkjunum hefur þá á fyrri stigum verið kynnt álit ESA og þau fengið tækifæri til að færa fram sín rök sem og að ljúka málunum með því að gera viðeigandi ráðstafanir innan tilskilinna fresta.