Sýknaður af ákæru um vörslu barnakláms

Hæstiréttur sýknaði í dag mann sem var ákærður um vörslu barnakláms og þar með staðfesti Hæstiréttur dóm Héraðsdóms Austurlands.

Í málinu er manninum gefið að sök að hafa haft í vörslum sínum, á utanáliggjandi hörðum diski, ellefu myndbönd sem sýna börn á kynferðislegan og klámfenginn hátt.

Ákæruvaldið hélt því fram að framburður ákærða í skýrslu hans hjá lögreglu 19. desember 2012 verði vart skilinn á annan hátt en að maðurinn hafi viðurkennt að hafa tekið frá myndefni, sem varðaði börn, og sett í sérstaka möppu á framangreindum diski.

Sakborningurinn hélt því aftur á móti fram að myndböndin hefðu verið sett inn á diskinn án hans vitundar.

Málskostnaður mannsins verður greiddur úr ríkissjóði en kostnaðurinn er tæplega ein milljón króna.