Tútta af snuði festist í koki 17 mánaða stúlku: Snuðið sent til rannsóknar

Búið er að innkalla 150 snuð frá framleiðanum MAM úr verslunum landsins. Tútta af slíku snuði losnaði og festist í koki 17 mánaða stúlku á mánudag. Málið er komið til rannsóknar hjá framleiðandum.

Innflutningsaðili snuðanna er Halldór Jónsson ehf. Ásgeir Sveinsson, framkvæmdastjóri fyrirtækisins, harmar atvikið en segir að um einsdæmi sé að ræða. Hann hvetur þó foreldra til að prófa snuðin, með því að toga í túttuna, áður en þau eru tekin í notkun.

„Öllum ítrustu öryggisstöðlum sem hægt er að fara eftir er fylgt. MAM er austurrískt merki og þeir segja að svona eigi ekki að geta gerst. En ef það gerist þá fer í gang mjög fastmótað ferli. Við erum búin að senda snuðið út til rannsóknar sem gæti þá gefið okkur svör hvað hefur mögulega getað orsakað þetta,“ segir Ásgeir. Því hafi öll snuð með sama lotunúmeri verið tekin úr umferð og færð til rannsóknar.

Barðist við að ná andanum

Stúlkunni ungu varð ekki meint af. Móðir hennar, Karen Ingólfsdóttir, segir það Angel-Care lífvaka að þakka að ekki fór verr. Barnið er hjartveikt og sefur því á lífvakanum, en hann gaf frá sér viðvörunarhljóð sem varð barninu til lífs

„Þegar tækið pípti hljóp ég inn til hennar og sá að hún væri að berjast við að anda. Það blæddi úr nefinu hennar og hún var öll í blóði. Ég tók hana upp og sló á bakið á henni til að reyna að fá hana til að anda en það gekk ekki neitt,“ segir Karen í samtali við Vísi. Karen ákvað að líta upp í munn dóttur sinnar og sá þar aðskotahlut sem hún að lokum náði úr koki hennar. Sjúkralið var kallað til sem flutti stúlkuna á sjúkrahús.

„Hún hefur það fínt núna en er særð í hálsinum. Hún var bæði að rembast við að ná andanum og ég særði hana með því að reyna að ná túttunni úr henni.“

Karen er, sem ber að skilja, í áfalli eftir atvikið. Hún vill verða öðrum víti til varnaðar og hvetur foreldra því til að prófa snuðin fyrir notkun.

Innlegg frá Karen Ingólfs.